A pesada lousa da burocracia

Christian Concello Salceda A Nova Peneira

Christian é un neno de 12 anos de Salceda que, contra a súa vontade, veuse envolto nunha situación delirante. El practica o fútbol, está federado no equipo DENIS SUAREZ, de Salceda de Caselas, non é feliz, non está cómodo e quere marcharse, quere xogar no Caselas de Tui. A súa nai, Lucía, comunicouno en infinidade de ocasións por todo tipo de vías, pero o equipo de Salceda non lle deixa, non lle concede a baixa, segundo nos conta a nai argumentan que o regulamento obriga a comunicalo entre o 1 e o 31 de xullo, e ela díxoo por primeira vez a finais de agosto. Lucía está farta de petar en todas as portas, equipo, concello, federación e de que ninguén lle dea unha solución para algo tan sinxelo e humano como permitir que un neno de 12 anos xogue no equipo que quere xogar. A Nova Peneira falou con ela

Como se chama o teu fillo?

Christian Martínez Cabral

Cantos anos ten?

12 anos

Cóntanos cal é o problema?

O ano pasado fixo a temporada con Denis Suárez

Ese é un equipo de fútbol de Salceda, que ten que ver o xogador do celta con el?

O seu pai é o presidente e supostamente o equipo é del

Do propio xogador?

Si

Este ano Christian comezou a facer a pre temporada no mesmo equipo, verdade?

Si, e ás dúas semanas de tela comezado sempre viña moi mal dos adestramentos, incómodo e chorando. Eu solicitei a baixa do neno, primeiro por whats app, e eles contéstame que iso non é de falar por teléfono, entón presenteime alí

Alí ,onde?

Nas súas oficinas que están no propio concello de Salceda

Con quen falas e que che di?

Falo con Jorge o seu administrativo, e el dime que teño que falar con Loli, directiva, e con Gelo, coordinador

Reunícheste con eles?

Si, fun co neno e cun representante do Caldelas

Por que do Caldelas?

É o equipo no que quere xogar o meu fillo

Déronche unha solución?

Non. Eu pedina, incluso ofrecín pagarlles os 130€ que é a cota anual deles, e as súas palabras textuais foron que nin por 1.000€ me daban a baixa do neno, que lle tiña que ter avisado a finais da temporada anterior

Déixasme abraiado, non me colle na cabeza, e en que data foi esa reunión?

O 28 de agosto deste ano

Pero, insisto no meu asombro, un neno non é libre de decidir que non quere seguir nun equipo, quedo absolutamente estupefacto

Eles din que teñen un regulamento de réxime interno que hai que cumprir, e incluso cando falei eu coa federación dixéronme que tiña que telo avisado ao longo do mes de xullo

E que fixeches ti despois

Falar co concelleiro de deportes de Salceda. Non serviu para nada. Logo co pai de Denis, o presidente do equipo que me volve a dicir que non. Logo o director da escola Denis Suárez pediume un informe psicolóxico do neno para darme a súa baixa

Como?, non dou crédito¡¡

Así mesmo, e leveino a un psicólogo que fixo o informe polo que paguei 90€, a maiores tamén presento un informe da súa pediatra que manifesta que o neno sofre un problema psicoemocional a raíz da situación. Mándoo e vólvenme a dicir que non

E ti seguiches intentándoo?

Si claro, o 18 de setembro púxenme en contacto coa Federación española de fútbol. Contestáronme que ían pórse co tema, seica abren un parte e danme 48 horas para que eu acredite que son a nai do neno, fágoo e dinme que llo van pasar ás escolas de fútbol Denis Suárez e dinme que lle van dar 7 días para que aleguen

E despois deses 7 días?

Seguimos no limbo, pasaron e 7 máis nos que eu chamo todos os días por teléfono, a diferentes horas ao secretario de Louzán, sempre está reunido

Segues sen resposta a día de hoxe, 25 de outubro?

Si, por desgraza si e eu estou disposta a chegar a onde faga falta, a un neno non se lle pode tratar así.

Primer comentario

Deixa a túa opinión

A súa dirección de correo electrónico non será publicada.


*