Breve análise dos resultados en Marín

Artigo de opinión A Nova Peneira
Pedro M. Cortegoso Gago Artigo Opinión A Nova Peneira
Pedro M. Cortegoso Gago Traballador da Sanidade Pública e militante do BNG de Marín

Marín, 17 de Xullo do 2020

Nunha primeira valoración dos resultados electorais das pasadas autonómicas en Marín, só podemos dicir que foron uns bos resultados para o nacionalismo. Uns bos resultados para o BNG que quedou en segunda posición superando ao PSOE. Pasando dos 984 votos, o 8,28%, do ano 2016 a uns 2.187 votos, o 20,08%. No resto do Morrazo os datos son aínda mellores, superando o 30% dos votos no resto dos concellos.

Non podemos negar o efecto Pontón. Temos, con diferencia, a mellor candidata. Unha candidata arroupada por unha organización capaz de manter nas situacións máis difíciles a presencia e o traballo en practicamente todos os concellos da Galiza.

En Marín non podemos negar este efecto Pontón, non se explicarían estes resultados sen ese máxico efecto. O que tampouco podemos negar é o traballo feito neste último ano polo nacionalismo en Marín, un traballo feito a pan de millo, para recuperarse e volver a poñerse no sitio que lle corresponde.

Estamos no bo camiño, sobrevivimos á desfeita das municipais mantendo a representación nunha situación e nun escenario moi difícil. Estamos afeitos ás carreiras de fondo, o noso son as maratóns. E non somos fachendosos se afirmamos que estamos facendo un bo traballo institucional no concello, a pesar de ter só unha concelleira.

Compre salientar e agradecer o apoio e a colaboración das persoas, que desinteresadamente e sen ser militantes colaboran con nós, especialmente nas últimas campañas electorais, para facer o noso traballo

Aínda queda moito por facer para converter o nacionalismo en Marín nunha alternativa real ao goberno de María Ramallo. Os resultados das pasadas eleccións non poden embebedarnos de éxito, o camiño segue sendo longo e complicado. Porén, temos tres anos por diante para demostrar co traballo día a día e presentando alternativas que estamos á altura do que demanda o pobo de Marín.

Só temos un método para chegar á meta: traballar.

Traballo para incrementar a nosa implantación social, fuxindo de liortas estériles e facéndoo a pe de rúa. Sen caer no papanatismo virtual, sen deixármonos engaiolar polas “redes”. Xa vimos o que lles pasa aos que non teñen organización e non existen na realidade física, cando ven un mal vento desaparecen. Nós non somos un proxecto político virtual, somos reais.

A alternativa ao PP é mais necesaria se cabe despois desta nova maioría absoluta, tendo en conta as primeiras decisións do Fexióo eliminando a ambulancia medicalizada do Salnés e pechando unha planta de pediatría no Hospital Alvaro Cunqueiro.

Quedan por diante catro anos nos que teremos que combinar a loita institucional e a loita nas rúas para poñer freo ás claras intencións do novo goberno para continuar saqueando o noso país. E tres anos para demostrar a valía do proxecto nacionalista en Marín.

Primer comentario

Deixa a túa opinión