{"id":4388,"date":"2020-12-03T10:00:23","date_gmt":"2020-12-03T09:00:23","guid":{"rendered":"http:\/\/www.anovapeneira.gal\/?p=4388"},"modified":"2020-12-03T12:15:14","modified_gmt":"2020-12-03T11:15:14","slug":"o-proxecto-de-instalacion-de-parques-eolicos-nas-serras-da-groba-e-o-galineiro","status":"publish","type":"post","link":"https:\/\/www.anovapeneira.gal\/index.php\/2020\/12\/03\/o-proxecto-de-instalacion-de-parques-eolicos-nas-serras-da-groba-e-o-galineiro\/","title":{"rendered":"O proxecto de instalaci\u00f3n de parques e\u00f3licos nas Serras da Groba e o Gali\u00f1eiro"},"content":{"rendered":"\n

O plano e\u00f3lico da Xunta de Galicia contempla a instalaci\u00f3n de 57 aeroxeradores de enormes dimensi\u00f3ns nestas d\u00faas zonas. En concreto prev\u00e9 situar 44 no espazo da serra da Groba e 13 nas 400 hect\u00e1reas de maior valor ecol\u00f3xico e patrimonial do monte do Gali\u00f1eiro. A tramitaci\u00f3n dos permisos necesarios para que as empresas, que te\u00f1an a concesi\u00f3n da s\u00faa explotaci\u00f3n, iniciasen os estudos necesarios para proceder \u00e1 montaxe dos mu\u00ed\u00f1os, produciuse en pleno estado de alarma, cando todas e todos estabamos obrigados a confinarnos nas nosas casas. Xa que logo a capacidade de resposta da sociedade civil quedaba moi seriamente limitada, cando non anulada, pois non exist\u00eda a posibilidade legal de xuntarse para poder consensuar opini\u00f3ns ou acci\u00f3ns de protesta. Asemade segundo nos informan distintos portavoces de asociaci\u00f3ns e colectivos ,que sobre o terreo se organizan a toda presa para tratar de loitar contra este novo desatino do PP, a opacidade informativa da administraci\u00f3n auton\u00f3mica \u00e9 absoluta. Ningu\u00e9n da Xunta se puxo en contacto coas persoas e asociaci\u00f3ns interesadas para comunicarlles o que vai pasar cos seus montes. Por outra parte, a procura de informaci\u00f3n resulta terriblemente dif\u00edcil e c\u00f3mpre pouco menos que un minucioso e denso traballo de investigaci\u00f3n digno dos mellores detectives para poderen co\u00f1ecer que \u00e9 o que a administraci\u00f3n galega ten previsto facer nestas d\u00faas zonas de singular importancia. Todas as persoas coas que falamos afirman con claridade que eles non est\u00e1n en contra das enerx\u00edas renovables. O modelo de enerx\u00edas baseadas en combustibles f\u00f3siles semella evidente que est\u00e1 esgotado. O car\u00e1cter finito dos combustibles e o perigo do quecemento global, e o conseguinte cambio clim\u00e1tico que a s\u00faa emisi\u00f3n \u00e1 atmosfera provoca fai imprescindible que a humanidade procure novos modelos de alimentaci\u00f3n enerx\u00e9tica. O consenso entre a comunidade cient\u00edfica ao respecto \u00e9 case un\u00e1nime. Ag\u00e1s o primo de Mariano Rajoy e alg\u00fan outro que se mova en formas carpetovet\u00f3nicas de interpretar a realidade ,hoxe practicamente ningu\u00e9n discute a necesidade de mudar de modelo enerx\u00e9tico. Por\u00e9n, o que non parece cabal \u00e9 este modelo de agresi\u00f3n brutal, a dous dos espazos m\u00e1is significativos e fermosos de Galicia, nunha inmensa operaci\u00f3n sobre a natureza que inevitablemente supor\u00e1 trastornos estruturais significativos a ambas serras, pois 57 mu\u00ed\u00f1os implican enormes toneladas de material a transportar para o que ser\u00eda imprescindible a construci\u00f3n de pistas e estradas, a transformaci\u00f3ns de h\u00e1bitats singulares e a posta en perigo, cando non a destruci\u00f3n, de patrimonio arqueol\u00f3xico e natural valios\u00edsimo.<\/p>\n\n\n\n

Non parece veros\u00edmil que o beneficio da poboaci\u00f3n sexa a motivaci\u00f3n real desta xigantesca operaci\u00f3n que, repito, de concretarse por\u00e1 en perigo de morte a supervivencia de dous dos espazos m\u00e1is significativos da nosa contorna. As\u00ed pois, en 2019 a poboaci\u00f3n do Baiona, Gondomar, Nigr\u00e1n, Oia, O Rosal, Tomi\u00f1o e A Guarda era de 77.000 habitantes. Para abastecer de electricidade a esta poboaci\u00f3n ser\u00edan necesarios 13 a\u00e9reo xeradores de 2 MW e tan s\u00f3 7 de 3 MW. Tan s\u00f3 na Serra da Groba vanse instalar 44!<\/p>\n\n\n\n

Por que?, Para que ?, A quen beneficia esa situaci\u00f3n?<\/strong><\/h2>\n\n\n\n

Se consideramos a situaci\u00f3n doutros concellos do pa\u00eds galego nos que xa hai bastantes anos que viviron a instalaci\u00f3n de parques e\u00f3licos semellantes ser\u00eda relevante responder con rigor \u00e1s seguintes preguntas:<\/p>\n\n\n\n

-Os parques e\u00f3licos contribu\u00edron a mitigar o grave problema demogr\u00e1fico que ten o rural galego?<\/strong><\/h2>\n\n\n\n

-Os parques e\u00f3licos contribu\u00edron \u00e1 creaci\u00f3n de emprego estable na poboaci\u00f3n galega?<\/strong><\/h2>\n\n\n\n

-Os parques e\u00f3licos contribu\u00edron a facer m\u00e1is barato o prezo da electricidade ao consumidor?<\/strong><\/h2>\n\n\n\n

-A poboaci\u00f3n foi compensada dalgunha maneira polo enorme impacto que estas inmensas estruturas supuxeron na s\u00faa vida coti\u00e1?<\/strong><\/h2>\n\n\n\n

Lamentablemente a resposta a todas esas cuesti\u00f3ns semella ser NON.<\/strong><\/h2>\n\n\n\n

En Galicia existen no momento presente 4.026 mu\u00ed\u00f1os en 106 concellos diferentes. Analizada a poboaci\u00f3n de 56 destes lugares vemos como en 50 deles o volume de persoas que viv\u00edan neles descendeu nos \u00faltimos 24 anos unha media do 28%.Sigamos baixando ao terreo do concreto e imos falar a modo de exemplo dun dos Concellos da nosa \u00e1rea de influencia, o Concello de Covelo. Neste concello instal\u00e1base un parque e\u00f3lico no ano 2.006.En xaneiro dese mesmo ano o alcalde naquel momento Jos\u00e9 Costa do PP, declaraba nunha reportaxe ao respecto en La Voz de Galicia:<\/p>\n\n\n\n

\u201cO parque e\u00f3lico \u00e9 unha aposta de futuro que dar\u00e1 beneficios para todos a longo prazo\u201d<\/p>\n\n\n\n

Por desgraza a realidade dos feitos emp\u00e9\u00f1ase en desmentir a propaganda, e se botamos unha ollada \u00e1 evoluci\u00f3n da poboaci\u00f3n de Covelo vemos que esta non para de baixar. No ano 2.006 viv\u00edan en Covelo 3.602 persoas e no ano 2.019 a cifra de habitantes baixara ata os 2.396.Un 33 % das persoas que viv\u00edan nese concello, en tan s\u00f3 13 anos, xa non viven nel<\/p>\n\n\n\n

Onde est\u00e1 a fixaci\u00f3n de poboaci\u00f3n?<\/strong><\/h2>\n\n\n\n

Onde est\u00e1 a promoci\u00f3n do emprego?<\/strong><\/h2>\n\n\n\n

Por que temos que pensar que nos concellos da contorna da Groba e do Gali\u00f1eiro vai ser diferente?<\/strong><\/h2>\n\n\n\n

Na actualidade o buque insignia da industria e\u00f3lica en Galicia, a factor\u00eda de Siemens Gamesa referente na fabricaci\u00f3n de pas para aeroxeradores instalada no concello d’As Somozas, est\u00e1 en plena crise. Anuncia o despedimento de 52 traballadores\/-as e a rebaixa da s\u00faa produci\u00f3n semanal de pas: de nove a catro. A propia empresa explica que “todos os escenarios son posibles, mesmo o peche definitivo por cesamento da actividade\u201d<\/p>\n\n\n\n

Como \u00e9 posible que ante a inminencia da instalaci\u00f3n de novos parques e\u00f3licos a principal empresa da industria e\u00f3lica do nos pa\u00eds estea despedindo persoas e incluso considerando a posibilidade de pechar a factor\u00eda por cese de actividade?<\/h4>\n\n\n\n

M\u00e1is de 60 colectivos un\u00edronse asinando un manifesto no que amosan a s\u00faa oposici\u00f3n rotunda a instalaci\u00f3n destes parques e\u00f3licos nas Serras da Groba e o Gali\u00f1eiro e argumentan as raz\u00f3ns que motivan a s\u00faa posici\u00f3n. Por outra banda semella que a posici\u00f3n das corporaci\u00f3ns afectadas vai tam\u00e9n por ese mesmo cami\u00f1o. Nese sentido temos que destacar a unanimidade acadada no Concello de Oia, un dos m\u00e1is afectados, no que incluso o equipo de goberno do PP votou a favor dunha moci\u00f3n presentada polo BNG que manifestaba o seu rexeitamento aos parques e\u00f3licos no seu territorio. Para saber m\u00e1is do estado das cousas acheg\u00e1monos ao terreo e falamos cos representantes de tres colectivos directamente implicados:<\/p>\n\n\n\n

O IEM( Instituto de estudos mi\u00f1oranos)<\/strong><\/h4>\n\n\n\n

Xos\u00e9 Ant\u00f3n Rodr\u00edguez presidente da comunidade de montes de Santa Mar\u00eda de Oia<\/strong><\/h4>\n\n\n\n

Alberto Covelo presidente da comunidade de montes de Vincios<\/strong><\/h4>\n\n\n\n

Vela\u00ed vai o que deron de si as tres conversas<\/p>\n\n\n\n

IEM<\/strong><\/h2>\n\n\n\n
\n\n\n\n

Falamos con Xos\u00e9 Lois, Bruno, Xilberte, Bieito, Juan e Alex<\/p>\n\n\n\n

\u201cA ALGU\u00c9N SE LLE OCORRER\u00cdA IR AO SERENGUETI A METER MU\u00cd\u00d1OS?,POIS \u00c1 XUNTA DE GALICIA, SI.\u201d<\/strong><\/h4>\n\n\n\n

\u201cN\u00d3S NON ESTAMOS EN CONTRA DAS ENERX\u00cdAS RENOVABLES, ESTAMOS EN CONTRA DESTE MODELO ENERX\u00c9TICO COLONIZADOR QUE NOS QUERE IMP\u00d3R O PP\u201d<\/h4>\n\n\n\n

Ben, malia que este \u00e9 unha entrevista motivada polo suposto intento de chantar un parque e\u00f3lico na Groba e no Gali\u00f1eiro, quixera iniciar a conversa d\u00e1ndovos os parab\u00e9ns pola distinci\u00f3n tan importante que vos concedeu o concello de Baiona que supo\u00f1o que vos far\u00eda ilusi\u00f3n?<\/strong><\/p>\n\n\n\n

N\u00f3s non somos de premios, non \u00e9 iso o que buscamos co noso traballo. A\u00ednda que o reco\u00f1ecemento do que facemos si que \u00e9 de agradecer, dependendo de quen ve\u00f1a claro, porque se isto vi\u00f1ese da Xunta n\u00f3s non iriamos recoller o premio.<\/p><\/blockquote>\n\n\n\n

Xa vexo que v\u00f3s sodes un pouco daquela forma de ser que de forma tan bonita describ\u00eda Machado: \u201cNunca persegu\u00ed la gloria de dejar en la memoria de las gentes mi canci\u00f3n\u201d?<\/strong><\/p>\n\n\n\n

Exactamente, n\u00f3s somos de significados e non de significantes. N\u00f3s, tanto nos concellos en particular como na sociedade en xeral buscamos outras cousas, por exemplo o compromiso, e non os premios.<\/p><\/blockquote>\n\n\n\n

Unha pregunta inicial para contextualizar a situaci\u00f3n: O IEM e as distintas plataformas que estades amosando a vosa oposici\u00f3n aos proxectos dos parques e\u00f3licos na Groba e no Gali\u00f1eiro, estades en contra das enerx\u00edas renovables?<\/strong><\/p>\n\n\n\n

Non, claro que non. N\u00f3s estamos en contra deste modelo enerx\u00e9tico colonizador que nos quere meter o PP, a dereita e o capital. N\u00f3s estamos pola produci\u00f3n dom\u00e9stica de enerx\u00eda<\/p><\/blockquote>\n\n\n\n

\"O<\/figure>\n\n\n\n

Entrando en materia, dic\u00eddeme cando e como co\u00f1ecedes a existencia do proxecto e\u00f3lico na Groba?<\/strong><\/p>\n\n\n\n

Foi en pleno confinamento, recibimos un correo dun especialista inform\u00e1ndonos do tema <\/p><\/blockquote>\n\n\n\n

Quen vos informou?<\/strong><\/p>\n\n\n\n

Dami\u00e1n Copena, unha persoa que estivo na Universidade de Vigo, logo na de Lisboa e agora na de Oviedo, e a s\u00faa especialidade \u00e9 precisamente a dos parques e\u00f3licos. El leva traballado moit\u00edsimo sobre o tema da pegada econ\u00f3mica e social dos parques e\u00f3licos en Galicia<\/p><\/blockquote>\n\n\n\n

E en que consistiu a informaci\u00f3n?<\/strong><\/p>\n\n\n\n

En principio vimos que o plano e\u00f3lico de Galicia determinaba que o que era un parque e\u00f3lico na Groba agora pasaban a ser 6 parques, e o n\u00famero de mu\u00ed\u00f1os que queren meter na serra aumentaba ata os 44.<\/p><\/blockquote>\n\n\n\n

Cal foi a vosa reacci\u00f3n?<\/strong><\/p>\n\n\n\n

Tes que pensar que estabamos en pleno confinamento, polo que o ti\u00f1amos moi dif\u00edcil, pero a\u00ednda as\u00ed comezamos a movernos e inter actuar virtualmente porque somos conscientes de que coa lei de fomento das iniciativas empresariais que tan atinadamente se deu en chamar \u201c lei de depredaci\u00f3n\u201d os prazos administrativos axil\u00edzanse moito. Os prazos para facer alegaci\u00f3ns de calquera tipo diminu\u00edron tanto que non hai posibilidade de facer mobilizaci\u00f3ns nin de artellar unha resposta adecuada por parte da sociedade civil. Esta lei \u00e9 estudada ao lonxe porque como se di vulgarmente o capital descansa pero non dorme.<\/p><\/blockquote>\n\n\n\n

E consensuastes algunha resposta?<\/strong><\/p>\n\n\n\n

Falamos cos compa\u00f1eir@s da plataforma do gali\u00f1eiro e de SOS Groba e a primeira resposta foi tentar que os partidos pol\u00edticos, antes da campa\u00f1a das auton\u00f3micas que \u00e9 no momento no que estabamos, manifestaran a s\u00faa posici\u00f3n ao respecto. Fixemos un pequeno documento que enviamos a todos os partidos pol\u00edticos que ti\u00f1an representaci\u00f3n en todos os concellos afectados<\/p><\/blockquote>\n\n\n\n

Cales son todos os concellos afectados?<\/strong><\/p>\n\n\n\n

Se falamos do Gali\u00f1eiro e da Groba: Vigo, Mos, O Porri\u00f1o, Gondomar, Tomi\u00f1o, O Rosal, Oia, Baiona e indirectamente Nigr\u00e1n<\/p><\/blockquote>\n\n\n\n

Mandastes o documento a todos os partidos que te\u00f1en representaci\u00f3n nas corporaci\u00f3ns de todos eses Concellos?<\/strong><\/p>\n\n\n\n

Si, a todos e cada un<\/p><\/blockquote>\n\n\n\n

Cal foi a resposta?<\/strong><\/p>\n\n\n\n

Recibimos contestaci\u00f3n de Podemos Val Mi\u00f1or, de Manifesto Mi\u00f1or do BNG da comarca de Vigo e do resto a\u00ednda estamos \u00e1 espera<\/p><\/blockquote>\n\n\n\n

As respostas recibidas en que termos foron?<\/strong><\/p>\n\n\n\n

As tres organizaci\u00f3ns amosaban unha posici\u00f3n claramente contraria a eses parques e\u00f3licos<\/p><\/blockquote>\n\n\n\n

E o PSOE e o PP non vos deron contestaci\u00f3n?<\/strong><\/p>\n\n\n\n

Non, non o fixeron. C\u00f3mpre engadir por\u00e9n que na nosa \u00e1rea principal de actuaci\u00f3n si pedimos aos concellos que asemade dos partidos manifestaran a s\u00faa opini\u00f3n. Nigr\u00e1n foi o primeiro que o levou a pleno, e o resultado foi a posici\u00f3n contraria do Concello ao parque e\u00f3lico<\/p><\/blockquote>\n\n\n\n

Un\u00e1nime?<\/strong><\/p>\n\n\n\n

Non, O PP abst\u00edvose<\/p><\/blockquote>\n\n\n\n

Os demais Concellos?<\/strong><\/p>\n\n\n\n

En Gondomar pasou exactamente o mesmo, sa\u00edu o rexeitamento aos parques e\u00f3licos coa abstenci\u00f3n do PP. Aqu\u00ed debemos destacar e valorar a actitude espelida do seu alcalde. E en Oia a moci\u00f3n que presentou o BNG foi aprobada por unanimidade. En Baiona no momento de realizar esta reportaxe a\u00ednda non se celebrara o pleno no que se \u00eda tratar. Estamos pendentes tam\u00e9n da toma de posici\u00f3n de Tomi\u00f1o e O Rosal.<\/p><\/blockquote>\n\n\n\n

E de Mos, Porri\u00f1o e Vigo sabemos algo?<\/strong><\/p>\n\n\n\n

Non, de momento non sabemos nada.<\/p><\/blockquote>\n\n\n\n

No momento presente, finais de novembro, cal \u00e9 o estado das cousas sobre o terreo, na Groba?<\/strong><\/p>\n\n\n\n

Ben, en pleno confinamento co\u00f1ecemos que hai maquinaria na Groba e indo ata al\u00ed vimos a unha empresa facendo uns buracos para p\u00f3r unha antena metereol\u00f3xica<\/p><\/blockquote>\n\n\n\n

Sabemos quen contratou a esa empresa?<\/strong><\/p>\n\n\n\n

Acciona. N\u00f3s preguntamos se ti\u00f1an todos os permisos pertinentes e o enxe\u00f1eiro que estaba al\u00ed contestou que \u201cpor suposto\u201d<\/p><\/blockquote>\n\n\n\n

E temos constancia de que \u00e9 as\u00ed?<\/strong><\/p>\n\n\n\n

N\u00f3s metemos un escrito por rexistro no Concello de Baiona o 27\/10 ,pedindo ver o expediente, e contest\u00e1ronnos o 20\/11 dicindo que si os ti\u00f1an. Temos constancia pola resposta do Concello, pero ver, o expediente, a n\u00f3s non nos deixaron<\/p><\/blockquote>\n\n\n\n

Que \u00e9 o que fixeron esas persoas na Groba?<\/strong><\/p>\n\n\n\n

Arredor de 10 ou 12 buracos para ancorar uns soportes sobre os que puxeron algo parecido a unha especie de mastro dun barco. Iso no alto e na gabi\u00f1eira, que \u00e9 al\u00ed ao lado, puxeron un aparello estra\u00f1o que seica \u00e9 unha estaci\u00f3n metereol\u00f3xica<\/p><\/blockquote>\n\n\n\n

Cal ser\u00e1 o obxecto da instalaci\u00f3n deses instrumentos na Groba?<\/strong><\/p>\n\n\n\n

Pois entendemos que facer medici\u00f3ns para estudar a colocaci\u00f3n dos 44 mu\u00ed\u00f1os que o plano e\u00f3lico de Galicia permite colocar na Serra da Groba<\/p><\/blockquote>\n\n\n\n

Ese plano e\u00f3lico quen o elaborou?<\/strong><\/p>\n\n\n\n

A Xunta de Galicia<\/p><\/blockquote>\n\n\n\n

Cal \u00e9 a vosa posici\u00f3n sobre a lei e\u00f3lica de Galicia?<\/strong><\/p>\n\n\n\n

Estamos en contra pois esa lei non favorece nin ao tecido empresarial do pa\u00eds, nin aos propietarios do terreo nin aos consumidores. S\u00f3 favorece aos grandes produtores<\/p><\/blockquote>\n\n\n\n

A luz non \u00e9 m\u00e1is barata al\u00e1 onde se produce?<\/strong><\/p>\n\n\n\n

Non, radicalmente non.<\/p><\/blockquote>\n\n\n\n

Ser zona produtora supo\u00f1o que xerar\u00e1 alg\u00fan tipo de beneficio?<\/strong><\/p>\n\n\n\n

Xera unhas rendas \u00ednfimas en comparaci\u00f3n coas inmensas desfeitas que provoca.<\/p><\/blockquote>\n\n\n\n

\u00c9 f\u00e1cil localizar informaci\u00f3n sobre estes parques?<\/strong><\/p>\n\n\n\n

Non, todo o contrario \u00e9 inmensamente dif\u00edcil. As p\u00e1xinas da Xunta son un aut\u00e9ntico labirinto e al\u00e9n de que hai unha total opacidade informativa , a informaci\u00f3n , cando a atopas, resulta en moitas ocasi\u00f3ns contraditoria.<\/p><\/blockquote>\n\n\n\n

En que fontes de informaci\u00f3n bebedes v\u00f3s?<\/strong><\/p>\n\n\n\n

Da Xunta, das construtoras e das promotoras, do Instituto nacional de estat\u00edstica….Procuramos acadar informaci\u00f3n de todos os sitios que podemos e as nosas conclusi\u00f3ns resultan da an\u00e1lise dos datos<\/p><\/blockquote>\n\n\n\n

De feito, cada conclusi\u00f3n que emitimos sempre vai sustentada por todas as fontes informativas das que sacamos os datos necesarios.<\/p><\/blockquote>\n\n\n\n

V\u00f3s credes que pronto vai estourar todo?<\/strong><\/p>\n\n\n\n

Estamos \u00e1 expectativa. O \u00fanico que sabemos \u00e9 que na p\u00e1xina da Xunta concr\u00e9tanse as coordenadas de 57 a\u00e9reo xeradores , 44 na Groba e 13 no Gali\u00f1eiro<\/p><\/blockquote>\n\n\n\n

Segundo esas coordenadas, os parques son municipais?<\/strong><\/p>\n\n\n\n

Non, alg\u00fans son supra municipais<\/p><\/blockquote>\n\n\n\n

No caso de que finalmente o plano e\u00f3lico se concretase tal como est\u00e1 dese\u00f1ado, que supor\u00eda?<\/strong><\/p>\n\n\n\n

A altitude m\u00e1xima da Groba son 650 metros e estamos falando de mu\u00ed\u00f1os de 200 metros de altura. \u00c9 dicir cada mu\u00ed\u00f1o mide 1\/3 da altitude m\u00e1xima da Groba. O Gali\u00f1eiro ten 750 metros de altura m\u00e1xima, e igualmente m\u00e1ndanlle al\u00ed mu\u00ed\u00f1os de 200 metros. O impacto ser\u00eda brutal. F\u00edxate, seguro que co\u00f1eces a ponte de Rande. Esta Ponte ten desde a plataforma de rodaxe ata o cumio 80 metros de altura m\u00e1is o que lle puxeron agora para os novos tirantes. Seguro que como a todo o mundo cada vez que pasas pola ponte de Rande par\u00e9ceche brutal, pois comp\u00e1raa esa altura cos 200 metros dos mu\u00ed\u00f1os.<\/p><\/blockquote>\n\n\n\n

Cantas pas levan os mu\u00ed\u00f1os e que lonxitude te\u00f1en?<\/strong><\/p>\n\n\n\n

Son 3 pas por mu\u00ed\u00f1o e de 57 metros de lonxitude cada unha. Exactamente o que mide de alto a Torre de H\u00e9rcules na Coru\u00f1a<\/p><\/blockquote>\n\n\n\n

E hainos que montar no chan claro?<\/strong><\/p>\n\n\n\n

Si, claro e facer uns encofrados no chan que miden 25×25 por 3 de profundidade. Sigamos coas comparativas e digamos que un Vitrasa mide 12 metros de longo. Far\u00edan falta dous vitrasas, un detr\u00e1s de outro para ver o longo da base que fai falta constru\u00edr no chan para montar cada mu\u00ed\u00f1o. E a Groba e o Gali\u00f1eiro non son terra, son fundamentalmente rocha, e iso non se saca cunha pa e cun cazo<\/p><\/blockquote>\n\n\n\n

Dinamita?<\/strong><\/p>\n\n\n\n

Si claro, non queda outra. E que vai pasar con todo ese entullo?. Temos un problema moi serio referente \u00e1 montaxe dos mu\u00ed\u00f1os. De que maneira o queren facer?. Un monstro como ese non \u00e9 algo que se semente e xa est\u00e1, \u00e9 imprescindible utilizar maquinaria pesada para o seu transporte e modificar substancialmente o terreo para poder facer as pistas necesarias que faciliten o seu traslado<\/p><\/blockquote>\n\n\n\n

As pistas que existen na actualidade non ser\u00edan suficientes?<\/strong><\/p>\n\n\n\n

De ningunha maneira. Ser\u00eda imprescindible a construci\u00f3n de pistas novas que supor\u00edan na pr\u00e1ctica, arrasar coa serra. E por desgraza non s\u00f3 \u00e9 nestas d\u00faas serras, \u00e9 as\u00ed en toda Galicia. O futuro que te\u00f1en dese\u00f1ado para o pa\u00eds \u00e9 un pa\u00eds e\u00f3lico, madeireiro e mineiro.<\/p><\/blockquote>\n\n\n\n

O impacto deses mu\u00ed\u00f1os se finalmente se constr\u00faen ir\u00eda moito m\u00e1is al\u00e1 do ambiental e o paisax\u00edstico, verdade?<\/strong><\/p>\n\n\n\n

Si claro. A serra da Groba alberga h\u00e1bitats e especies que est\u00e1n inclu\u00eddas na directiva HABITAT europea que obriga \u00e1s administraci\u00f3ns a protexer. Este parque e\u00f3lico est\u00e1 encima de espazos de interese comunitario. \u00c9 dicir non s\u00f3 non se conservan os espazos naturais que temos a obriga legal de conservar sen\u00f3n que a\u00ednda por riba se pretende estragalos. Incluso hai un inventario de zonas h\u00famidas que sit\u00faan na serra da Groba dous lugares en concreto como zonas de especial interese a protexer, e estes parques e\u00f3licos est\u00e1n enriba deles. A destruci\u00f3n ambiental ser\u00eda tremenda pero \u00e9 que non queda s\u00f3 niso, tam\u00e9n afectar\u00eda aos cursos de auga cunha alteraci\u00f3n brutal do r\u00e9xime h\u00eddrico. E unha cousa na que tam\u00e9n estamos traballando \u00e9 do que a xente non \u00e9 moi consciente a\u00ednda \u00e9 que os mu\u00ed\u00f1os te\u00f1en unha vida media de arredor de 20\/25 anos<\/p><\/blockquote>\n\n\n\n

E que se fai cos que caen en desuso?<\/strong><\/p>\n\n\n\n

Pois hoxe en d\u00eda, no caso das pas non hai mecanismos de reciclaxe e haber\u00e1 que soterralas ou mandalas a vertedoiros, e en Galicia estamos cerca de enfrontarnos a esa realidade pois os parques m\u00e1is antigos xa est\u00e1n a piques de cumprir esa idade. E claro, os mu\u00ed\u00f1os novos non se poden montar nas zapatas dos vellos, iso \u00e9 imposible, co que non queda outra que constru\u00edlas novas<\/p><\/blockquote>\n\n\n\n

A Groba \u00e9 unha zona de alt\u00edsimo valor arqueol\u00f3xico, supo\u00f1o que tam\u00e9n se ver\u00eda afectado ese patrimonio?<\/strong><\/p>\n\n\n\n

E tanto que si. Na Groba hai arredor de 500 xacementos arqueol\u00f3xicos moitos deles sen catalogar. Sobre todo hai arte rupestre pero tam\u00e9n m\u00e1moas e minas de ouro romanas e desde logo que se ver\u00edan seriamente afectados<\/p><\/blockquote>\n\n\n\n

E no que respecta aos cabalos?<\/strong><\/p>\n\n\n\n

Segundo a hip\u00f3tese de Felipe B\u00e1rcenas son os \u00fanicos e \u00faltimos cabalos salvaxes que hai no mundo. Unha hip\u00f3tese bastante plausible<\/p><\/blockquote>\n\n\n\n

Cantos hai?<\/strong><\/p>\n\n\n\n

1.500.Un patrimonio important\u00edsimo que se ver\u00eda en serio perigo. En verdade a algu\u00e9n se lle ocorrer\u00eda ir ao Serengeti a meter mu\u00ed\u00f1os?, pois \u00e1 Xunta de Galicia, si. Hai zonas da Groba nas que \u00e9 imposible chegar se non se constr\u00faen pistas novas e moito m\u00e1is amplas, e iso implicar\u00eda indefectiblemente afectar \u00e1s \u00e1reas de pastos naturais dos cabalos<\/p><\/blockquote>\n\n\n\n

Imos falar dos datos deses parques e\u00f3licos m\u00e1is antigos que xa te\u00f1en cerca de 20 anos para ver se a realidade confirma ou desminte os supostos beneficios da s\u00faa instalaci\u00f3n. Como repercutiron eses mu\u00ed\u00f1os na poboaci\u00f3n local e na poboaci\u00f3n comarcal?<\/strong><\/p>\n\n\n\n

N\u00f3s tam\u00e9n temos investigado ao respecto, e consideramos que haber\u00eda que responder de maneira rigorosa \u00e1s seguintes preguntas: Diminu\u00edu o paro?, mellorou a calidade de vida dos seus habitantes? aumentou a poboaci\u00f3n?, polo menos freouse a s\u00faa ca\u00edda?, baixou o prezo da electricidade?<\/p><\/blockquote>\n\n\n\n

Estou desexando saber a resposta a todas esas preguntas?<\/strong><\/p>\n\n\n\n

A resposta \u00e9 un rotundo non a todas e a cada unha delas.<\/p><\/blockquote>\n\n\n\n

Pero xerar\u00e1n postos de traballo?<\/strong><\/p>\n\n\n\n

S\u00f3 mentres se constr\u00faen, logo desaparecen pois unha mesma empresa leva o mantemento de arredor de media ducia de parques<\/p><\/blockquote>\n\n\n\n

Supor\u00e1n alg\u00fan tipo de beneficio?<\/strong><\/p>\n\n\n\n

Para as grandes empresas, si, claro.<\/p><\/blockquote>\n\n\n\n

Poderiades mencionar alg\u00fan exemplo concreto que te\u00f1ades estudado?<\/strong><\/p>\n\n\n\n

Si, falamos por exemplo do concello de Muras, na provincia de Lugo. Este Concello ten arredor de 270 kmts cadrados e ten 700 habitantes .Te\u00f1en 381 mu\u00ed\u00f1os montados, un para cada 0,5 persoas. Nese concello te\u00f1en un bono el\u00e9ctrico para as unidades familiares cun m\u00e1ximo de 600\u20ac ao ano e depende da renda desas familias<\/p><\/blockquote>\n\n\n\n

E a poboaci\u00f3n desde que se instalaron os aeroxeradores medrou?<\/strong><\/p>\n\n\n\n

Non, baixou desde as novecentas e pico que eran naquel momento \u00e1s seiscentas e pico que son na actualidade. Pero non \u00e9 que se mudaran \u00e1s principais vilas da comarca \u00e9 que a poboaci\u00f3n baixou en todas as localidades. \u00c9 dicir , o slogan de que a instalaci\u00f3n de parques e\u00f3licos contrib\u00fae a fixar poboaci\u00f3n \u00e9 rotundamente falso. E tal como pasa nesa comarca pasa nas demais .Se falamos por exemplo da serra da Capelada, na Coru\u00f1a, pasa exactamente o mesmo. E Na Costa da Morte \u00eddem, inclu\u00edndo concellos importantes como Santa Comba e Negreira.<\/p><\/blockquote>\n\n\n\n

E no que temos m\u00e1is preto, na Paradanta?<\/strong><\/p>\n\n\n\n

Baixou a poboaci\u00f3n absolutamente en todos os concellos<\/p><\/blockquote>\n\n\n\n

A pulsi\u00f3n xeral que percibides na sociedade da comarca cal \u00e9?<\/strong><\/p>\n\n\n\n

\u00c9 moi maioritariamente contraria.<\/p><\/blockquote>\n\n\n\n

Nestas ligaz\u00f3ns que nos achegan do IEM pode consultar, quen o desexe, v\u00eddeos explicativos sobre a situaci\u00f3n:<\/p>\n\n\n\n

https:\/\/qrco.de\/bbqRxd<\/a><\/p>\n\n\n\n

\n