Reconciliación

Artigo de opinión A Nova Peneira
Lucas Suárez A Nova Peneira
Lucas Suárez, Historiador

No medio do balbordo desatado no Estado español trala exhumación do ditador Francisco Franco, hai unha palabra que destaca entre as demais pola frecuencia coa que se alude a ela e a disparidade ideolóxica das voces que a pronuncian: RECONCILIACIÓN, que segundo a Real Academia Galega é “a acción e efecto de reconciliar ou de reconciliarse”, que a súa vez, e segundo a mesma fonte é “facer que deixe de haber calquera tipo de inimizade entre dúas ou máis persoas que antes eran amigas”. Chegados a este punto, non queda máis que preguntarse quén ou qué ten que reconciliarse nesta cuestión, pois son moitos os partidos políticos, dende o PSOE a VOX, pasando polo PP, os que din, por exemplo, que o Val dos Caídos ten que se converter nun lugar de reconciliación, e aos que non acreditamos nese palabro aplicado a este contexto non dubidan en tildarnos de vingativos.

Pois ben, a reconciliación non é posible. Non é posible a reconciliación cunha ideoloxía asasina e brutal como é o fascismo. Co fascismo un non se reconcilia, combate e loita porque, ademáis, os fascistas non queren reconciliarse con ninguén xa que ese termo non entra no seu código ideolóxico. Estamos fartos de asistir a discursos cargados de odio dos novos ou non tan novos fascistas españois nos que non se aprecia nin un mínimo desa tan cacarexada reconciliación, así que… de qué estamos a falar?

Pero aínda podemos ir máis alá, pois non sería ofensivo e humillante reconciliarse en nome de quen xa non está e foi asasinado, torturado, exiliado ou represaliado de calquera outra forma polo réxime de Franco? Non sería esta reconciliación no seu nome un insulto á súa memoria? Eu estou convencido de que sí.

O Val dos Caídos non pode ser, en modo algún, un monumento á reconciliación, senón un memorial que faga xustiza ás vítimas do fascismo. Esa é a palabra que debemos usar sen temor a ser mal chamados vingativos, pois si hai algo que está nas antípodas da vinganza iso é a xustiza, non a humillante reconciliación.