Na praza do mercado de Salceda está “ Cárnicas o Labrego”, unha carnicería explotada pola terceira xeración dunha mesma familia. Comezou sendo carnicería Rosendo, pasou a ser carnicería Cándida e a súa actual propietaria , desde o ano 2020, Noelia Rodríguez, chamouna “ O Labrego”. Co novo nome quería simbolizar os vínculos históricos e emocionais tan importantes que a súa familia ten co mundo rural. Eles son do Torrón, un lugar na extrema entre Cabreira, parroquia de Salvaterra, e Entenza, parroquia de Salceda. Alén da carnicería, Noelia rexenta xunto co seu home,unha explotación gandeira de preto de 150 cabezas, coas que fornece de carne ao seu negocio.
Non é nada doado facer o que fai esta familia. Esixe atención constante as 24 horas do día os 7 días da semana. Todos os días ás 6:30 da mañá comezan a súa xornada laboral atendendo aos seus animais , xornada que reparten entre a gandería e a carnicería. E todo o fan coa ilusión de quen sente que o seu negocio é unha parte indisoluble de si mesmos, e coa intención de que todos os seus clientes e clientas teñan o mellor produto posible o antes posible.
Noelia Rodríguez Fernández
“Ofrecemos un produto de máxima calidade a un prezo accesible para calquera peto”
Noelia, queremos coñecerte un pouco máis
Ben eu son natural de Cabreira, son unha muller comprometida coa miña comunidade á que lle gusta moito facer o que fai. Teño unha carnicería na praza de Salceda: Cárnicas O Labrego, e rexento unha gandería.
Unha rapaza de Cabreira de onde se sente: de Cabreira, de Salvaterra de Salceda…?
Eu son de Cabreira e síntome de Cabreira. Tamén me sinto de Salceda, porque o lugar no que vivo, O Torrón, está no límite con Salceda, de feito eu nacín no Torrón de Entenza e vivo no Torrón de Cabreira. E a gandería téñoa a metade en Entenza e a metade en Cabreira.
Caramba, entón case podemos dicir que o concepto de vivir na extrema está pensado para ti?
Ha, ha, ha, ha..Pois si, a verdade é que si.
Como e cando comezou a túa vinculación coa carnicería?
Sobre o ano 2018. Na miña familia tiñamos unhas tenreiras. A carnicería era dos meus padriños e vendiámoslle as tenreiras que criabamos. Cando a miña madriña tivo que xubilarse decidín quedar eu co carnicería.
Canto tempo levaba a túa madriña coa carnicería?
Toda a vida, xa era dos seus sogros e logo foi dela.
Es a terceira xeración nesta carnicería?
Si. Comezou sendo Carnicería Rosendo, logo Carnicería Cándida e agora Cárnicas o Labrego.
En que ano a colliches ti?
No ano 2020, en plena pandemia.
Xa hai que ser valente para aventurarse nun negocio en plena pandemia.
Ao ter gandería propia e a miña madriña ter que xubilarse pois decidimos seguir co negocio, aínda que eu viña dunha rama totalmente diferente a esta.
De que sector viñas?
Estudei Administracións e Finanzas e centreime en relacións laborais. Traballaba co meu marido nunha carpintería de madeira da que somos propietarios. Contratamos a unha rapaza para que se fixera cargo das miñas xestións alí, e eu aventureime na carnicería. Tiven que facer un curso intensivo de carnicería e aquí estou.
Custouche cambiar de sector?
Non, gústame moito máis isto cá oficina. Quixera salientar tamén que na gandería colaboramos con escolas ensinando aos nenos e ás nenas como é unha explotación gandeira por dentro. E é unha actividade enormemente enriquecedora.
Como comezas o teu día a día ?
Levántome ás 6:30, baixo á gandería e doulle de comer ao gando. Agora é todo moi enxebre, pero temos un proxecto xa aprobado do Concello de Salceda e para o 2026 montaremos unha gandería moderna, cómoda e automática que estará integramente en Entenza.
Cantas persoas traballan contigo nesta gandería familiar?
Meu marido e eu imos pola mañá a darlles de comer. Está o meu compadre que nos bota unha man e meu sogro e meu pai. Catro persoas na gandería e outras catro comigo na carnicería.
De onde son as tres persoas que traballan contigo na carnicería?
Unha de Salceda, outra de Salvaterra e outra de Mondariz.
Cantos animais tendes?
148 cabezas entre vacas e tenreiras.
Estas cabezas mercádelas ou nacen na gandería?
Temos as propias que nacen aquí e outras mercámolas para crialas. Tamén temos convenios con granxas de leite ás que lle mercamos os becerros que lles nacen. Eles quedan coas vacas para o leite e nós traemos aos becerros cando fan un mes para crialos.
Canto tempo necesita unha destas crías para estar lista para a carnicería?
Uns nove meses.
Sacrificades vos aos animais?
Levámolos ao matadoiro a Pontevedra. Temos un camión que cargamos dúas veces á semana para isto.
Que tipo de alimentación lles dades a estes tenreiros nestes nove meses?
Maioritariamente millo triturado e fermentado. Cultivámolo nós e logo de seis meses de fermentación é o que comen. tamén lles damos herba seca.
O cen por cento do produto que vendedes en Cárnicas O Labrego é propio?, que tipo de carne vendedes?
A de tenreira e vaca si é propia, logo vendemos porco que é noso ao cincuenta por cento, mercámolos de pequenos e cebámolos. Tamén vendemos polo, salgados e elaborados.
Entendo que criando vós, a vosa carne debe de ser de calidade?
Pois si,é de moi boa calidade. Nós xa desde sempre queremos que os nosos clientes e clientas poidan acceder á mellor carne galega a un prezo razoable. Creo que esa idea de negocio é a chave que explica a nosa longa historia.
Que horario tedes na carnicería?
De 8:30 h. a 14:00 h. pola mañá e de 16:30 h. a 20:30 h. pola tarde de luns a sábados. Descansamos as tardes dos luns e dos mércores.
Onde botas máis tempo, na carnicería ou na gandería?
Pola mañás vou dúas horas á gandería, logo vou a carnicería ata as 15:00 h. Polas tardes estarei a metade do tempo entre a carnicería e a gandería e polas noites na gandería de novo. Estarei máis ou menos o mesmo tempo nos dous sitios.
Isto implica dedicarlle moitísimas horas ao día?
Si, de luns a domingo, aos animais hai que coidalos todos os días.
Compatibilizar este ritmo coa vida persoal non debe de ser moi fácil?
Non o é,non. A avantaxe é que a min me gusta moito o que eu fago. Teño un fillo pequeno, Mateo, e el ven para a gandería comigo. Compartimos moito tempo nese contexto. A final, cando fas algo que che gusta, xeras espazos que xa transcenden o laboral e convértense nun universo de afectos e emocións.
A Mateo gústalle o mundo no que gañades a vida o seu pai e máis ti ?
Si, moito, quere ser veterinario de maior, agora xa revisa aos animais para ver se están enfermos. Para min estar aquí é mais fácil a hora de compatibilizar coa vida familiar, eu podo levar ao neno ao cole e as súas actividades. Na oficina non podería facelo. Adapto os meus horarios de traballo aos do meu fillo.
Cal é o perfil da clientela de tedes?
Maioritariamente de máis de 50 anos. Para captar á clientela máis nova estamos facendo os elaborados.
Como son os prezos do que vendedes: accesibles? ou é difícil mercar carne fresca?
Como antes mencionei; o noso produto é de grande calidade, e o prezo é accesible para calquera peto.
Cales son os produtos máis demandados?
Costeletas de tenreira, están moi boas.
A carnicería está na praza, como está a Praza de Salceda?
Necesita unha reforma, vai facerse agora, a primeira fase, a finais de ano e a segunda fase para mediados do 2026.
Hai moitos negocios na praza?
Non, hai poucos. Queremos animar á xente a que monte os seus negocios aquí.
Cales son os que hai?
Outra carnicería, unha froitería e unha tenda bar.
Que tal se porta o Concello de Salceda con vós?
Moi ben.
E do de Salvaterra ?
Non teño relación co Concello, animáronme unha vez a que emprendese alí pero o meu interese e quedarme aquí en Salceda.
É difícil ser emprendedora?
Ten que gustarche e dedicarlle moito tempo, tes que estar pendente as 24 horas.
Cales son as mellores e as peores épocas do ano?
As mellores son o verán e o nadal, pero en xeral todo o ano é bo.
O consumo de carne decaeu nos últimos tempos? ou é estable?
Ao contrario, no meu negocio cada vez hai máis demanda.
Para rematar Noelia, ti es a terceira xeración deste negocio, será Mateo, o teu fillo, a cuarta xeración?
Da carnicería non creo, ten moi claro que quere ser veterinario, da gandería pode ser que queira seguir con ela.
Cando Noelia se xubile, aínda que es nova e falta moito para iso, será a última xeración da carnicería?
Non o sei, daríame moita pena que non tivese relevo pero non o sei, aínda queda moito tempo e prefiro non pensar niso. Só podo dicir que no momento actual estou plenamente centrada en mellorar cada día para ofrecer aos meus clientes un produto de calidade que se achegue á excelencia. Quero que o noso negocio siga comprometido coa nosa contorna e coa sociedade na que vivimos durante todo o tempo que nos quede na profesión ao meu home e a min…Despois….pois non o sei, só o tempo o poderá dicir.
