O Centro Comercial Aberto Estrela de Marín xunto coa Federación de Comerciantes e Industrias do Morrazo, Fecimo, veñen de unir as súas forzas no que supón a nosa integración na Federación de Comerciantes e Industriais do Morrazo.
Este acordo, a través do cal se crearán sinerxias, supón a unión comercial das catro vilas da comarca do Morrazo, sendo unha mostra da boa saúde e fortaleza do tecido asociativo do que goza a comarca morracense. Na redacción do acordo establécese que Estrela de Marín e Fecimo benefícianse mutuamente dos convenios e vantaxes e colaborarán estreitamente no desenvolvemento de novas vías para promover as compras no comercio local do Morrazo.
A primeira acción que poremos en marcha en conxunto, será a vindeira campaña de Nadal que dará comezo o vindeiro luns 7 de decembro e no que entre ambas entidades poremos encirculación 15.000€ en premios para incentivar as vendas no comercio de proximidade.
Para as dúas entidades é un logro moi importante reunificar comercialmente a comarca, sumando esforzos, representatividade e traballando en conxunto en prol do beneficio común. Especialmente nunha época na que a unión e a solidariedade teñen que ser bandeiras do pequeno comercio fronte a outros modelos comerciais impersoais e sen compromiso coa contorna no que se ubican.
Agardamos que esta iniciativa sexa un exemplo e que sirva de impulso fortalecedor ao pequeno comercio e á hostalería do Morrazo no seu conxunto.
