A Deputación remata actuacións de mantemento en 88 campos de fútbol de 41 concellos da provincia

Deputación de Pontevedra

O Plan de Mantemento anual ten por obxectivo conservar as cubertas nas mellores condicións para a práctica deportiva e aumentar a vida útil destas instalacións deportivas

4 de decembro de 2023

A Deputación de Pontevedra acaba de rematar o acondicionamento anual de 88 campos de fútbol de 41 concellos da provincia de Pontevedra, dos que 63 correspóndense con instalacións de herba sintética e os 25 restantes de herba natural. As actuacións están encadradas dentro do programa de mantemento provincial de campos de fútbol, co que a Deputación aporta maquinaria e persoal para levar a cabo o mantemento e cuxo obxectivo é conservar as cubertas nas mellores condicións para a práctica deportiva e, ao mesmo tempo, aumentar a súa vida útil.

No caso dos terreos artificiais os procesos que se levaron a cabo foron a limpeza e retirada de elementos vexetais e corpos estraños que se acumulan co paso do tempo (papeis, follas, tapóns, etc.), a descompactación do céspede con maquinaria especializada que incrusta unhas púas de goma vibrantes e o cepillado da cuberta artificial e recebado, é dicir, reposición de area ou caucho. A maquinaria dispoñible para facer estes traballos foi un tractor e un apeiro subsolador-varredora.

No que respecta aos campos de herba natural as actuacións realizadas foron escarificado (realización de pequenos cortes verticais) para aumentar a densidade da herba, picado da superficie para o aireado da terra, recebado (aporte de arena), e sementeira. A maquinaria empregada neste caso foi un tractor e tres apeiros: picador, escarificador e sementador.

Neste 2023 actuouse en campos de fútbol dos concellos da Cañiza, A Estrada, A Illa de Arousa, Agolada, Arbo, As Neves, Baiona, Barro, Caldas de Reis, Cambados, Campo Lameiro, Cangas, Covelo, Gondomar, O Grove, Lalín, Meaño, Meis, Moaña, Mondariz, Moraña, Nigrán, Pazos de Borbén, Poio, Ponteareas, Ponte Caldelas, Pontecesures, Pontevedra, Portas, Redondela, Ribadumia, Salceda de Caselas, Salvaterra de Miño, Sanxenxo, Silleda, Tomiño, Tui, Valga, Vigo, Vilaboa e Vilagarcía de Arousa.