A IGM denuncia unha nova utilización retorcida do feminismo e de Pardo Bazán por parte da Xunta de Galicia a fin de inaugurar Meirás cun acto totalmente alleo á memoria

Iniciativa Galega pola memoria

O colectivo alerta  de novo do intento do goberno de Núñez Feijóo de facer co Pazo o mesmo que fixo con San Simón, que dixo ía ser a illa do pensamento e a poesía, e acabou sendo un parque de atraccións con ginkanas e festas de piratas e disfraces

A Coruña, 1 de marzo de 2021.

A Iniciativa Galega pola Memoria vén de denunciar unha nova “utilización retorcida” do feminismo e da figura de Emilia Pardo Bazán por parte da Xunta de Galicia, que anunciou a súa intención de celebrar en Meirás a entrega das medallas que, co nome da ilustre escritora, premian iniciativas ou persoas destacadas no ámbito da igualdade. Previsto para o 8 de marzo, o acto sería o primeiro a celebrar no Pazo desde que a xustiza lle recoñeceu a propiedade ao Estado e, para a IGM, o feito de que non se escolla inauguralo cun recoñecemento ás vítimas do franquismo e á propia loita en contra da impunidade e o esquecemento realizada polo pobo galego, é unha burla á memoria, que adquire maior gravidade no seu intento de agochala nun acto de recoñecemento á imprescindíbel loita para a igualdade que leva a cabo o feminismo e que a IGM apoia sen fisuras. 

A plataforma, que engloba a asociacións de memoria de todo o país, alerta, máis unha vez, do intento do goberno de Núñez Feijóo por facer en Meirás o mesmo que fixo coa illa de San Simón, á que lle mudou o tratamento de “illa da memoria” para rebautizala como “illa do pensamento”. Aseguraban que sería un alicerce para a creación poética, literaria e artística pero acabaron programando actividades propias dun parque de atraccións, con ginkanas e festas de disfraces e piratas, totalmente incompatíbeis co pasado da illa como campo de concentración franquista. 

Neste caso, a escusa para afastar do Pazo a loita antifranquista é o feminismo e a figura de Emilia Pardo Bazán, cuxo recoñecemento institucional agromou coincidindo coa loita xudicial contra o espolio franquista auspiciada desde a cidadanía e que, ata a inasumíbel sentenza da Audiencia Provincial da Coruña, contaba co respaldo unánime das institucións democráticas. Insiste a IGM en que a mellor homenaxe que se lle pode facer a Emilia Pardo Bazán é precisamente denunciar un réxime patriarcal e aniquilador dos dereitos das mulleres como foi o franquista, e condenar un golpe de Estado que volveu relegar as mulleres ao papel de nais e esposas cando precisamente estaban empezando a adquirir dereitos como cidadás.

A plataforma avoga por realizar este acto de merecido recoñecemento ao traballo en prol da igualdade de Megumi Shiozawa, a Federación Provincial de Mulleres Rurais de Ourense e á Asociación Rede, mulleres veciñais contra os Malos Tratos de Vigo, nun lugar alternativo a Meirás.