Marcos Santos
Os próximos días 17, 18 e 19 de setembro, na praia de Cesantes, volve un ano máis, e xa son XIV , o festival Millo Verde de Redondela, unha das citas imprescindibles nos veráns da nosa vila antes de que a pandemia vírica viñera ás nosas vidas a facer normal a anormalidade. Agardemos que esteamos, paso a paso e pinga a pinga, dando os pasos necesarios, e no camiño correcto, para podermos esquecer pronto estas horribles circunstancias. Nós falamos con Lucía, unha das responsables da organización do festival
Lucía Barreiro
“Convido aos lectores e lectoras a que se acheguen a gozar con nós do Millo, que se vai celebrar en condicións de absoluta seguridade”
Por que edición imos xa Lucía?
Pois xa van 14
Contamos a do ano pasado non?
Si claro foi diferente, foi o “millo confinado”, pero foi .E foi posible grazas á colaboración de artistas locais e tivo moita aceptación por parte do público polas redes
E este ano temos de novo o millo sen confinar?
Pois si. Agardo que a situación epidémica evolucione ben e non haxa nada que o poida impedir. Nós estámonos preparando moi ben para cumprirmos de maneira estrita todos os protocolos sanitarios para que se poida facer o festival de maneira absolutamente segura
Cóntanos as medidas máis significativas?
A diferencia doutros anos non nos vai quedar outra que cobrar entrada para controlarmos que a asistencia se adecúe ao que o protocolo sanitario permita. Debemos ter persoal de seguridade para que controle as distancias de seguridade e haberá puntos para dispensar xel…
E non pensastes en non pór carpas e facelo ao aire libre?
Si, pero nós temos meigallo con relación ao tempo e non sei que pasa pero sempre que facemos o festival chove
Como podemos facer para mercar as entradas?
A venda on line comezará nos vindeiros días por unha páxina de venda de entradas que pronto facilitaremos, e logo teremos puntos físicos nos que se poderán adquirir
Dentro do propio festival?
Non, é preciso facelo de maneira anticipada. Quero deixar claro que o feito de cobrar entrada é inevitable. No caso contrario o festival non se podería facer pois desta volta as limitacións existentes fan que a afluencia de público e as barras sexan moito menos que habitualmente e , sen entrada, non sería posible
Supoño que na disco tasca poderemos mercalas?
Ha ha ha ha..Eu tamén o supoño
Ben, falemos dos grupos comezando por exemplo con “Pillabáns”?
Pois si, de Redondela temos aos “Pillabáns” e quixera destacar que o 80% das actuacións van ser galegas.
E o outro 20%?
Son de España e de Arxentina. Os grupos que temos de fóra son xa os que tiñamos pechados para a edición do ano pasado , que por circunstancias obvias non puideron vir
Os grupos na liña do Millo verdade?
Absolutamente. Música orixinal , de calidade, pouco coñecida e tamén para bailar desde logo
E o gañador das maquetas?
Como cada ano abrirá o festival.
Que horarios imos ter?
Dependerán das normas que estean vixentes nese momento en relación coa situación sanitaria. A verdade a un mes do comezo do festival aínda hai moitas cousas que temos no aire porque todo dependerá de como vaia evolucionando a pandemia. Pero o que damos por seguro é que o festival vaise facer. E quero aproveitar a oportunidade para convidar a todas e todos os lectores a que nos acompañen. Teño a certeza de que o van pasar xenial e de maneira segura.
