O pasado sábado 4 de decembro fixemos entrega do premio aos gañadores do noso concurso “ A Nova Peneira convídate a cear”. O concurso gañábao quen primeiro nos enviase, correctamente resolto, o noso encrucillado do mes de outubro, e o premio consistiu nunha cea para dúas persoas no restaurante A Camboa situado no porto de Oia. O local é unha preciosidade, que non podemos deixar de recomendar a todas as nosas lectoras e lectores, e a contorna, a carón do mosteiro de Oia, e ás beiras dun dos mares máis fermosos do mundo non podería ser mellor. Na imaxe; Cristina Correa alcaldesa de Oia que tivo a inmensa xentileza de achegarse ata o restaurante a parabenizar aos gañadores e darlles a benvida a Oia, Suso e Mar gañadores do concurso, e Eugenio Portela o propietario do restaurante ao que agradecemos a súa predisposición a colaborar coa nosa publicación na organización deste evento. Para A Nova Peneira o concello e Oia é como a nosa casa , así nolo fai sentir, unha e outra vez, a amabilidade da súa alcaldesa e de todos os seus veciños e veciñas. Teño a seguridade que despois deste sábado contan con dous amigos máis na comarca do Morrazo. Nós imos darlle continuidade ao noso concurso e faremos unha nova edición no próximo ano.
“Facían falta moitos máis medios de comunicación en idioma galego”
De onde sodes vós?
Do Morrazo. Suso é de Meira e eu son de Bueu
Quen fixo o encrucillado?
Fíxoo Suso. El é moi afeccionado aos encrucillados e a todo tipo de pasatempos-afirma Mar-
Desde cando sodes lectores de A Nova Peneira?
Desde que naceu. Somos subscritores creo que desde o seu primeiro ano de vida e chéganos puntualmente á nosa casa
Cal é a vosa opinión sobre a situación dos medios de comunicación no noso idioma?
Pois que, por desgraza, hai moi poucos. Facían falta máis medios como o voso ou como Nós, para que a sociedade galega tivera opcións de atopar unha forma de entender a nosa realidade desde aquí, e non interpretacións formuladas desde realidades diferentes.
Nada máis, moitas grazas pola vosa compañía todos estes anos, moitas grazas por participar no noso concurso, parabéns pola vitoria e agardo que gocedes da cea…
Grazas a vós. Seguro que si, o sitio é precioso e o premio fíxonos moita ilusión.
