O verán pasado unha nova directiva facíase cargo do equipo tomiñés. O seu presidente é un mozo que acaba de entrar nos 30 anos, e xa ten un pasado como ex xogador do club e un presente de entusiasta seareiro do equipo da súa localidade. Asume o cargo de presidente con moita ilusión de mellorar a realidade económica, social e deportiva do Tomiño FC, e entre os seus proxectos máis importantes está a construción dunha canteira da que agora carece. O novo presidente é natural de Vilachán, e traballa no departamento de recursos humanos dunha empresa. Nós conversamos con el.
Aitor Bouzada presidente
“O noso obxectivo deportivo esta temporada é, con toda claridade, o ascenso a primeira autonómica”
Fuches cociñeiro antes que frade?
Ha ha ha..Si, eu fun xogador do Tomiño.
Cando e como comezou a túa relación co mundo do fútbol?
Non sabería dicirche con exactitude. Desde que teño memoria o meu camiño e o do fútbol sempre foron inseparables. Xoguei en diferentes equipos: O Sárdoma, o Tyde, o Guardés , un ano nos xuvenís do Tomiño e logo xa pasei ao equipo sénior.
Ata que anos xogaches?
Ata os 26. Retireime moi pronto, seino. Tanto é así que creo que me quedou como unha espiña cravada, como unha conta pendente co fútbol e iso influíu en que agora sexa o presidente do equipo.
En que posto xogabas?
Dianteiro.
Trata de ser obxectivo: Eras bo?
Ha ha ha ha. Home está mal falar ben dun mesmo pero ,con toda humildade, eu creo que si, que lle pegaba bastante ben. Retireime hai 4 anos pero seguín vinculado emocionalmente ao club porque eu son, desde sempre, un seareiro inequívoco do Tomiño.
Cando e por que motivo asumiches a presidencia do equipo?
O Tomiño hai uns anos pasou un moi mal momento, estivo a piques de se desfacer. A directiva anterior fixo un bo traballo e conseguiu salvalo. Cando souben que o anterior presidente quería deixalo decidín formar unha directiva e asumir a xestión do equipo. Eu entrei como presidente no mes de xullo do ano pasado.
O traspaso de poderes como foi?
Moi tranquilo.
Cantas persoas sodes na directiva?
Oito persoas.
Cantos homes e cantas mulleres?
Somos de momento todos homes. Incorporar a algunha muller á xestión do club é un reto e un obxectivo que temos que cumprir.
Que realidade encontraches ao chegar á presidencia?
Unha realidade bastante boa. O club estaba economicamente saneado. Se cadra o proxecto deportivo estaba un pouco xusto.
Cantos equipos tendes?
Agora mesmo só dous: sénior e veteranos.
E non tes intención de ter fútbol base e fútbol feminino?
Para a temporada 24-25 imos ter equipo xuvenil. En Tomiño como sabes ao longo da nosa historia houbo sombras e problemas diversos que fixeron que o fútbol base e o fútbol feminino vaian por camiños diferentes. O fútbol base ten outra directiva é o AD Tomiño, e o fútbol feminino tamén ter outra directiva. Non é posible termos un equipo competitivo se non temos canteira.
Que tipo de relación tedes coa directiva do AD Tomiño?
Temos unha relación cordial, pero temos puntos de vista moi diferentes. A curto prazo non vexo posible a unificación polo tanto vou tratar de crear a nosa propia canteira. Todo isto dito con respecto escrupulosos ás persoas do AD Tomiño. As persoas do AD son rapaces de Tomiño que terán sempre o noso apoio e consideración.
En que campo xogades?
No campo municipal do Alivio.
Que tal están as instalacións?
Para min están perfectas.
Como se porta o concello con vós?
Ben, pórtase ben .No que nos poden axudar nos axudan. Somos conscientes de que os cartos son limitados e que hai que repartir con moitos.
En que división compite o equipo sénior e cal é o voso obxectivo deportivo esta temporada?
Estamos en segunda autonómica. A día de hoxe( 10/02) imos en 5º posto na nosa liga e o obxectivo deportivo é , con toda claridade , o ascenso. Penso que temos un moi bo equipo, creo que temos o mellor equipo dos últimos 10 anos, e estou convencido de que remataremos ascendendo.
Algúns dos xogadores son de Tomiño?
Si, claro. Temos 13 xogadores de Tomiño.
A liga é forte?
Moi forte e moi competitiva. Na nosa liga hai equipos moi solventes: O Ribera, o Goián, o Caselas, O Guardés….
Cales son os partidos de máxima rivalidade e tensión?
Os que xogamos contra o Goián. É o noso máximo rival.
Honestamente Aitor: Cando xoga o Goián ti que é o que desexas?
Ha ha ha ha. Dígocho con toda claridade: Desexo que perda.
Que tal é a vinculación do pobo de Tomiño co equipo?
Eu creo que moi boa. Volvemos instaurar o sentimento polo equipo. Enchemos o campo , con moita xente nova, e noto un apoio incrible da veciñanza. Eu creo que a nosa imaxe social é moi positiva.
Como vos financiades?
Con publicidade, cantina , as entradas para ver os partidos, rifas e a achega do Concello.