Todas as emendas aos Orzamentos da Xunta para 2026 presentadas polo Bloque foron rexeitadas polo partido popular de Rueda
Os portavoces municipais de Baiona, Gondomar e Nigrán laméntan que rodete da maioría absoluta do PP galego rexeite a totalidade das trinta emendas parciais formuladas polo BNG, que impedirá, co silencio cómplice do PP dos tres concellos, o investimento de preto de vinte millóns de euros no Val de Miñor”
Carmela González, deputada do BNG: “O PP priva a veciñanza do Val de Miñor dun incremento imprescindible para corrixir a marxinación que as contas de Rueda supoñen tanto para os tres concellos no seu conxunto como para cada un por separado”
Val de Miñor, 30 de decembro de 2025.- O Bloque Nacionalista Galego denuncia que o Partido Popular actúa contra os intereses da veciñanza do Val de Miñor ao rexeitar todas e cada unha das trinta emendas presentada polo Bloque ao proxecto de Orzamentos da Xunta de Galiza para o vindeiro 2026. “Máis unha vez, o rodete da maioría absoluta do PP no parlamento galego, co silencio cómplice do PP de Baiona, Gondomar e Nigrán, impedirá un investimento de vinte un millóns de euros no conxunto dos tres concellos”, indican os portavoces municipais do BNG, Manuela Rodríguez, Iago Pereira e Xavier Rodríguez.
Pola súa banda, a deputada nacionalista Carmela González denuncia tamén que coa súa negativa “o PP priva a veciñanza do Val de Miñor dun incremento imprescindible para corrixir a marxinación que as contas de Rueda supoñen tanto para o conxunto dos tres concellos como a cada un por separado.”
As emendas parciais relativas ao Val Miñor que o Bloque Nacionalista Galego formulou á proposta de orzamentos da Xunta para o ano 2026 centrábanse no reforzamento e alongamento dos servizos públicos, na reactivación económica, no medio ambiente, na vivenda e na mellora da mobilidade e das infraestruturas viarias. Do total das trinta propostas, sete constituían actuacións comúns para os tres concellos por un importe de algo máis de catro millóns de euros.
Máis e mellores servizos públicos para o conxunto do Val
No relativo á sanidade pública o BNG solicitaba o reforzo de medios e de cadro de persoal para a atención á saúde mental no centro de saúdeVal Miñor, que acumula listas de agarda de máis de seis meses.
En relación aos servizos sociais, ante a escaseza de prazas públicas e para facilitar a necesaria conciliación familiar, laboral e social, o BNG demandaba o incremento de prazas públicas de centro de día así como a construción dunha residencia de maiores para os tres concellos. Tamén a creación dun Punto de Encontro Familiar para atender ás tres localidades, evitando así que as persoas usuarias teñan que desprazarse a Vigo.
No tocante ao ensino e o deporte, a emendas ían dirixidas á implantación do bacharelato de artes nalgún dos institutos do Val Miñor para o vindeiro curso 2026-2027, á ampliación do dereito de transporte escolar ao estudantado do ensino non obrigado (bacharelato e FP), e á construción dunhas pistas de atletísmo.
7
Medio ambiente, infraestruturas e mobilidade
En materia de medio ambiente solicitaban a realización dun estudo para a recuperación e rexeneración da Foz do Miñor, na liña de corrixir a contaminación e de recuperar o seu banco marisqueiro.
Propuñan tamén un plan de reforestación con especies autóctonas e desenvolvemento de accións preventivas fronte aos incendios, sempre en colaboración coas Comunidades de Montes en Man Común.
En canto ás infraestruturas e a mobilidade propuñan o estudo para a avaliación do rescate da concesión para a súa xestión pública e a gratuidadeda AG-57, para que fora unha realidade no vindeiro ano, así como, no inmediato e como medida transitoria, bonificacións das peaxes desde o 1 de xaneiro de 2026.
Así mesmo, demandaban a mellora do servizo de transporte interurbano, co incremento de liñas e frecuencias directas para os desprazamentos aos Hospitais Álvaro Cunqueiro e Meixoeiro e á Universidade.
Unha aposta decidida pola promoción publica da vivenda
Unha das partidas de máis importante é a destinada a promoción pública de vivenda. Neste eido propúñase que o goberno galego invistira 10M€ entre os tres concellos do Val para iniciar un plan de habilitación de vivenda de promoción pública combinada con alugueiros de baixo custe, “no camiño de garantir o dereito á vivenda ás rendas máis baixas e de fixar poboación moza nos nosos concellos”, salientan desde a organización nacionlista.
Os tres voceiros municipais do BNG denuncian que, outro ano máis, “o PP volve votar contra o Val de Miñor” por impedir uns investimentos que suporían un reforzamento dos servizos públicos, a dotación de vivenda social e a mellora do medio ambiente, a mobilidade e as infraestruturas viarias, e que incidirían de xeito significativo na calidade de vida da veciñanza e na creación de emprego nos nosos concellos”, lamentan os concelleiros.
Primer comentario