Comeza unha nova temporada nas ligas de balonmán, e un ano máis os nosos amigos do balonmán Chapela afróntana a tope de ilusión coa intención de que o equipo sénior feminino ascenda a primeira categoría autonómica e o masculino poida repetir, como mínimo, a fase de ascenso que disputou a pasada temporada.

A xestión diaria deste tipo de equipos só pode ser posible cando hai persoas comprometidas e altruístas que lle dedican boa parte das súas vidas persoais a axudar a que o club poida seguir existindo. Unha delas é María, a presidenta do equipo, e boa amiga da nosa publicación.

María González Lago, presidenta.

“ Gustaríame que a sociedade Chapela se implicase un pouco máis co seu equipo”

Cantos anos levas como presidenta, María?

Dende o 2020.

Ben, entón aínda che han de quedar outros 20 como mínimo

Ha, ha, ha…. Veremos o que acontece. Hai que deixar entrar xente nova.

Cantas persoas sodes na directiva?

Somos sete persoas.

Cantas mulleres e cantos homes?

Moitas mulleres e poucos homes.

Es ti a que fai todo o traballo, María?

Non, facémolo entre todos. Eu levo a parte máis institucional, subvencións e todo iso. Despois outra leva as contas, outra controla os equipos…Repartímonos por áreas

Con que ánimos empezades esta tempada?

Coa idea de chegar á Final Four. Refírome aos dous equipos sénior, tanto no feminino como ao masculino.

En que división compiten os dous sénior?

O masculino, en Primeira Autonómica; o feminino, en Segunda.

En función da actividade económica de Chapela, cal cres ti que serían as categorías naturais dos dous equipos sénior?

Pois pola parte económica, os equipos deberían estar en Primeira Autonómica, os dous. A nós gustaríanos que estivesen en categorías superiores. Pero as realidades económicas son complicadas. Entón, para estar tranquilos e non ter problemas como os que houbo outros anos…Pois nestes intres o máis importante sería iso: consolidalos en Primeira Autonómica, os dous.

O masculino xa está consolidado, non? Este ano estivo na fase sector de ascenso.

Si. E que quede claro, todo o que veña a maiores benvido sexa

Vós chegastes a estar na Liga Asobal?

Si.

Cantos anos?

Cinco, creo.

Cinco.. Iso non é asombroso? Para Chapela, digo.

Para unha zona como Chapela é máis que asombroso, porque ao final nós somos unha parroquia dun concello.

E como se financiaba a Asobal naquela época? lémbralo?

Si, acórdome, claro que me acordo. Podo dicirche que naquela época era máis fácil conseguir pasta que agora. Había máis diñeiro da empresa privada. Hoxe a empresa privada é máis complicada. Naquela época estaba Pescanova, cando se ascendeu.

Pescanova era o principal patrocinador?

Claro. Patrocinaba todo aquí en Chapela. Ao club de balonmán e ao de fútbol.Despois si que é verdade que, cando se ascendeu, nos anos seguintes, Pescanova nos deixou colgados dun día para outro.Aquí veu ao rescate Manolo deRedcom. Tamén estivo uns anos axudando o Restaurante O Canario.

E todo iso acabouse

Si, o Canario fun dos mellores patrocinadores que tivemos sempre, porque sempre estaba aí. Cando non había ninguén, eles nunca fallaban.

Ben, entón, naquel momento tiñades patrocinadores importantes, pero agora non. E cres que polo volume económico, Primeira Autonómica sería a categoría na que poderiades estar?

Claro. Aí estamos tranquilos, cómodos economicamente. Que nos gustaría dar un paso máis? Si, pero necesitamos máis axuda da empresa privada. Xa non falo de subvencións, porque iso está todo baremado. O orzamento é o que hai. Sabes que eses son os cartos que podes levar dunha subvención.

Cales son os obxectivos deportivos para esta tempada, para os dous equipos?

O obxectivo do masculino é volver chegar á fase de ascenso. O ano pasado chegamos á Final Four, non nos metemos na final por nada.

Contra quen perdestes?

Perdemos contra Seis do Nadal, que despois perdeu contra a SAR. Ou sexa, que podería ter sido unha final SAR-Chapela, que sería unha final súper bonita,

E a SAR ascendeu?

Non, despois o ascenso é moi complicado, porque hai equipos verdadeiramente potentes.

O obxectivo é volver disputala?

Si, o obxectivo é volver disputar a fase de ascenso.

E no feminino cal é a meta?

Se se pode, ascender directamente a Primeira Autonómica. Ese é o obxectivo. O mínimo é a Final Four pero como ilusión chegar ao ascenso directo a Primeira Autonómica gañando a Liga.

Cantos equipos de canteira tedes?

Pois agora mesmo hai un equipo por categoría. Hai xuvenil, cadete e infantil, alevíns hai catro ou cinco, e despois en benxamíns igual debe haber outros dous. E logo, nos pequeniños, normalmente para dous ou tres tamén hai. Sobre doce equipos.

Cantos equipos son mozas?

A metade. Menos nos equipos de benxamíns e alevíns que van mesturados, os demais temos equipo masculino e feminino.

En total, cantos nenos e nenas tedes?

O ano pasado andabamos en total sobre 180. Este ano igual un pouco menos.

De onde son, María? De Chapela ou de outros lugares?

A maioría son de Chapela e de Teis.

E con ese volume de xente, que che parece o apoio do Concello?

Non temos queixa en canto á subvención, pero sempre esperamos algo máis. Pero tamén hai que entender que somos un concello que ten un montón de equipos, hai moitos deportes, e hai que repartir entre todos.

No que se refire ao coidado das instalacións, do pavillón que tal o fan?

Aí si que igual necesitabamos un pouquiño máis de mantemento, porque este pavillón, por exemplo, está 24 horas practicamente en funcionamento. Porque pola mañá ven o alumnado do instituto e despois hai actividades. Está funcionando permanentemente. As duchas son as mesmas que cando eu era cadete e vou facer 48 anos. Hai cousas ás que si que habería que meterlle man, non é que estea mal nin nada, pero habería que darlle unha volta ao pavillón.

Que orzamento tedes, María?

Sobre 80.000€ anuais.

Como facedes para sacar 80.000€ euros todos os anos?

Entre as subvencións e as cotas de xogadores e xogadoras. Verdadeiramente somos dos que menos cobramos. Cobramos moi axustado. A roupa e equipaxes agora se compra, non se dá, porque se non, non nos chega. Pero cobramos ao prezo de custo. Por exemplo, a ti véndoche un chándal que me vale 45, pois a ti doucho por 45.

Ou sexa, que entre as subvencións, as cotas, os socios, as publicidades, de aí sacamos o orzamento anual.

E que tal se portan sempre as empresas de Chapela?

Ben, as que se portan, pórtanse. Pero hai outras que non achegan ningunha axuda, non che abren nin a porta.

Para rematar, en canto á implicación xeral da sociedade de Chapela, estás contenta? A sociedade de Chapela implícase co equipo ou podería implicarse algo máis?

A xente que está porque ten fillos ou familiares aquí implícas