O veterano Abel Losada liderará a candidatura socialista pola provincia de Pontevedra o próximo 29N.Abel é profesor de economía na Universidade de Vigo, e, despois dunha extensa carreira de servizo público, afronta con ilusión a responsabilidade de liderar ao PSOE na nosa provincia, convencido de que van ser primeira forza en Pontevedra e de que, fronte a enquisas que claramente tratan de desmobilizar ao electorado progresista, se hai unha elevada participación é perfectamente posible repetir o goberno progresista liderado por Pedro Sánchez.
Abel Losada é un tipo ao que xa teño entrevistado outras veces e sempre que saio de falar con el teño a mesma sensación: é un conversador excelente, educado e culto, co que é un pracer compartir o tempo. Velaí vai o resultado da nosa conversa
“ Hai partido, claro que o hai. E imos tratar de gañalo ata o final, porque as persoas progresistas somos máis que as reaccionarias”
Concelleiro en Vigo, director xeral no bipartito, deputado autonómico e portavoz parlamentar do PSdeG, e agora ves de cesar como subdelegado do goberno en Pontevedra. Da túa ampla traxectoria como servidor público que foi o que máis satisfacción che achegou?
Ben, todo foi moi diferente e todo tivo a súa parte satisfactoria. Pero, se cadra foi o parlamento, porque alí estiven 14 anos e en tanto tempo sempre recibes máis satisfaccións. Por outra parte a actividade no parlamento permite actuar sobre problemas concretos transversais, que afectan a colectivos amplos. E cando podes axudar a que se resolva un conflito que afecta á vida diaria dalgún grupo de persoas,é moi satisfactorio.
A experiencia na subdelegación do goberno foi interesante para ti?
Si, moito. Foino porque me dei de conta de que o estado ten unha presenza no día a día moito maior do que parece.
Cando cesaches deste último cargo, no teu discurso de despedida dixeches dúas cousas que me chamaron a atención. A primeira que quero que expliques reprodúzoa literalmente: “ Só é progreso se progresamos todos”
Ten que ver coa miña posición intelectual socialdemócrata. Eu non entendo o progreso económico se non hai unha segunda fase de redistribución para que ninguén quede fóra. No caso contrario imos a sociedades tensionadas e inseguras, ata o punto de que poden chegar a colapsar.
A outra cuestión que me chamou a atención é a laudatio que fixeches das forzas de seguridade. Ti cres que a policía sempre, absolutamente sempre, cumpre co seu traballo de asegurar a orde pública con escrupuloso respecto aos dereitos democráticos da cidadanía a manifestarse e protestar?
Eu falei exclusivamente do que vivín como subdelegado do goberno. E o que eu vin foi uns funcionarios públicos moi respectuosos.
Estás falando dos mandos?
Ben, era cos que habitualmente trataba eu, claro. Pero tamén tratei con moitos axentes. Por exemplo, lembro con certa emoción como o día do apagón moitos gardas civís, que estaban de permiso, se presentaron voluntariamente na comandancia a axudar no que fixera falta.
Nas protestas que houbo contra a presenza dun equipo israelí na volta ciclista os antidisturbios respectaron o dereito de manifestación dos que protestaban?
Eu non estiven no alto de San Cosme. É certo que vin algún vídeo no que parecía que o dereito de manifestación ía un pouco máis alá. Entendo que a situación que se viviu naquel momento foi moi tensa para todos.
O que dixen ao respecto das forzas de seguridade na miña despedida da subdelegación de goberno refírese exclusivamente ao que eu vivín, que é o que coñezo. Non vai máis alá.
Un economista coma ti, como valora a posición intelectual dun candidato á presidencia do goberno como Santiago Abascal. que ante a pregunta de que hai que facer para poder seguir pagando as pensións manifesta non ter nin idea?
Teño serias dúbidas de que falando con rigor se poida dicir que Abascal teña algún tipo de posición intelectual.
Tes razón. Retíroo. Como valoras esas declaracións?
Eu creo que di iso porque no manual da extrema dereita pon que hai que dicir iso. O malo é o que hai detrás.
Que é o que hai detrás?
Negocio, puro e duro negocio. Utilizar as pensións para facer negocio con elas. A este respecto quero contar unha anécdota:no curso 82-83 entrei eu en 1º de económicas e un profesor díxonos que as pensións non eran viables.
Estamos falando de hai 44 anos¡¡.
Os ámbitos do público que están máis cuestionados son os que teñen maiores posibilidades de negocio, a sanidade e as pensións. E aí está o verdadeiro quid da cuestión: a dereita pon en dúbida a viabilidade das pensións para podelas converter nunha área de negocio.
Só hai dúas formas de artellar un sistema de pensións: Reparto, todos pagamos a pensión de todos, e Capitalización, no que cada un se paga a súa. Nós temos un sistema de reparto, defendido pola esquerda, mentres que a dereita defende os sistemas de capitalización. As pensións en España, nun sistema de reparto como temos, son viables?
Si, son viables. E a emigración é un elemento fundamental para que as pensións sigan sendo viables.
Sobre a dificultade do acceso á vivenda cal é a túa opinión?
Eu creo que hai dúas vías. Primeiro está a construción de vivenda pública que ten que ser un elemento moito máis importante do que o foi ata agora, e logo temos que ser valentes e non ter medo a poñer límites aos prezos dos alugueiros. Evidentemente non é o mesmo unha persoa que aforrou toda a vida, e que é propietario dun piso alugado que lle serve para complementar os seus ingresos, que un fondo que posúe 150 pisos, pero dalgunha maneira hai que limitar os prezos. A vivenda é un ben básico para a vida e non pode estar sometido 100 por 100 ao libre mercado.
Cando sexas deputado que posición vas defender en relación a AP9?
A min paréceme máis importante a gratuidade cá titularidade. Preocúpame a inxustiza flagrante de que a vía central de comunicación de Galicia teña unhas peaxes tan elevadas. Eu creo que hai que seguir na liña de baixar as peaxes ata que poidamos abordar de maneira rigorosa e seria canto significaría o rescate. A min o que non me gustaría é que se transferira a Galicia e que quen teña que afrontar o custo do rescate sexa a administración autonómica.
Altri está morto? ou pódese reactivar se o 29N a dereita consegue formar goberno?
Eu creo que está morto. Case desboto que se recupere ese proxecto aínda que a dereita chegase ao goberno. Deixo o case por se acaso, pero creo que sería moi difícil que ese tema se retomase. As restricións ambientais son moi importantes e o nivel de contestación social extraordinariamente elevado.
O PP mantén un discurso moi belixerante sobre a necesidade da independencia xudicial e de acatar sempre as súas sentenzas, agás cando o TSXG paraliza parques eólicos. Aí xa se moven noutros parámetros, e nese caso si que se pode falar de xuíces politizados. Cal é a túa opinión?
Eu non comparto en absoluto o discurso de que criticar unha sentenza sexa un atentado contra a independencia xudicial. Simplemente se critica algo que non se comparte. Parece que ás veces a dereita e o poder xudicial teñen unha comuñón de intereses que a min me é difícil de entender.
No caso do TSXG e o eólicos houbo un cambio de sección que foi unha manobra tan evidente que resulta imposible non vela.
Eu creo que o desenvolvemento dos eólicos ten que producirse dalgunha maneira que corrixa os profundos déficits na reversión dos beneficios ao territorio, e aos seus habitantes. Tamén é necesario considerar o seu impacto ambiental, e desde logo que hai sitios nos que non se poden pór.
Coñeces persoalmente ao xuíz Luis Villares?
Si, coñézoo. E non teño a máis mínima dúbida sobre que sempre fai o que considera xusto e correcto.
Con que ánimos encaras as eleccións do 29N?
Eu son un obreiro da política. Poño o mono de faena e traballo con moita ilusión tratando de escoitar os problemas e as visións de todo o mundo.
De todo o mundo?
De todo o mundo dentro da civilización. Se alguén me entra con algunha excreción como por exemplo” Perro Sánchez hijo de puta” pois evidentemente con ese tipo de persoas non é posible falar. Tamén as encaro con preocupación. En Madrid coincidiume cunha concentración de persoas vestidas de negro, e encarrapuchadas que berraban “ Maricones fuera de Chueca” que para min foi terrible, terrible é á vez revelador.
Revelador por que?
Porque é un indicio de que poderiamos ter serios problemas de regresión de dereitos. E esa posibilidade preocúpame moito.
Con honestidade Abel: é posible que o 29N a esquerda sume os 176 escanos necesarios para poder construír un novo goberno progresista?
Posible é, si claro que si. Non é fácil, pero tampouco é nin moito menos imposible. De feito estes días están saíndo enquisas que falan practicamente dun empate técnico. Desde logo as enquisas que daban unha vitoria esmagadora da dereita a min parécenme que a sobredimensionan dunha maneira máis que evidente.
Así por exemplo venme á memoria unha que en Murcia lle daba 8 escanos á dereita e só 2 á esquerda. Que o voto de esquerdas nesa comunidade só sexa dun 20% é totalmente inverosímil. Son enquisas feitas para desmobilizar. Hai partido, claro que hai partido, e imos tratar de gañalo ata o final
Por outra parte o contexto do mundo parece que amosa que a onda ascendente da dereita chega por fin á súa fin:Vitoria de Lula, derrota de Trump, derrota da dereita en Serbia, derrota de Netanyahu…O 29 N se hai unha mobilización masiva confío en que a dereita vai ser derrotada tamén no noso país. Porque os progresistas somos máis que os reaccionarios.
Na provincia de Pontevedra actualmente tendes 3 escanos. Cal é o teu obxectivo?
Vou tratar de pelexar polo 4.
Asinabas un 3-3-1, sendo o 1 do BNG?
Ben, tendo claro que vou pelexar para que a esquerda teña 4 e que ese 4º sexa socialista, ese 3-3-1 non estaría mal e si, si que o asinaba porque implicaría que a esquerda segue sendo maioría na nosa provincia.
No Senado pactastes coa Fronte Ampla unha lista conxunta chamada Senado de Progreso. No 23, de Pontevedra saíron 3 senadores do PP e 1 do PSOE. Aspirades a inverter o resultado e que no 27 saian 3 senadores de esquerdas e 1 de dereitas?
Claramente si. Se sumamos os votos do 23 do PSOE e de Sumar superan aos que obtiveron o PP +VOX. Ten que haber unha mobilización masiva e unha concentración do voto progresista na lista de Senado de Progreso, incluso dos votantes de esquerdas que para o congreso prefiran outras opcións, porque Senado de Progreso é a única oferta electoral que ten opcións realistas de sacarlle senadores ao PP e a VOX. Non esquezamos que na nosa provincia pactaron, e o PP só presenta dúas persoas ao senado e Vox 1, polo tanto se gañan eles, de Pontevedra sairía tamén un senador de Vox.
Por último unha cuestión que é realidade: Teño unha filla de 21 anos que ten serias dúbidas sobre se votar ao PSOE ou ao BNG. Por que debería votar ao PSOE ao teu xuízo?
Eu se fora a túa filla votaría ao PSOE, claro. Hai intereses do pobo galego que se cadra se defenden mellor desde Galicia, pero hai cuestións, que tamén lle van afectar no seu día a día, que van máis alá das comunidades autónomas. Por exemplo estou pensando agora na presión que mete EEUU para que destinemos o 5% do PIB á compra de armamento. Se iso se concretase o recorte de servizos sería brutal, e desde logo que afectaría gravemente ás mozas e mozos da idade da túa filla. Creo que ese tipo de decisións de estado se defenderían moito mellor se quen lidere eses gobernos progresistas, o PSOE, ten maiorías máis sólidas das que tivo esta lexislatura.
Aproveitando este tema unha pregunta máis: Ti cres que se o 29 N a dereita logra gobernar aceptarían a presión e levarían o 5% do PIB a gasto militar?
Absolutamente si.



