Os rapaces e as rapazas da escola de artes marciais Loren

Ximnasio Lorem Ponteareas

Os rapaces e as rapazas da escola de artes marciais Loren

Un orgullo para Ponteareas

A ilusión a toneladas que desprenden todos os alumnos e alumnas desta escola de artes marciais da nosa vila, e os seus indubidables éxitos deportivos, así como o bo facer dos seus preparadores, tan preocupados en formalos como deportistas como en contribuír a darlles valores humanos que lles permitan afrontar a vida en mellores condicións, merecen o recoñecemento da sociedade ponteareá. Recoñecemento que A Nova Peneira lles quere brindar. Velaí vai a imaxe de todos e todas e unha breve conversa con 6 deles. Por desgraza o limitado do espazo non permite conversar con todos. E é algo que me gustaría moito pois paseino moi ben no rato que compartimos. Moita sorte para eles e elas nas súas carreiras como deportistas, e sobre todo na difícil carreira da vida.

Mario 12 anos

Que é o mellor das artes marciais para ti?

Os amigos que fas, os adestramentos e a emoción das competicións

Que tal levas cando perdes un combate?

Ao principio moi mal, non me gustaba nada.

Agora xa o levo moito mellor e trato de aprender dos meus erros.

Uxía 17 anos?

Que é o mellor das artes marciais para ti?

Compartir experiencias coas compañeiras e os compañeiras e practicar un deporte marabilloso que achega valores moi importantes para a vida

Ata onde che gustaría chegar?

Ata onde se poida. Por min ata o infinito

Bruno 9 anos

Que é o mellor das artes marciais para ti?

Coñecer a xente e ir aos campionatos.

E ti, cando perdes un combate como o levas Bruno?

A ver, un pouco si que me enfado, a verdade. Pero só un pouco. Moito non choro

Ángela 9 anos

Que é o mellor das artes marciais para ti?

Aprender a defenderme ben e facer amigas e amigos. O que menos me gusta é cando non podo vir a adestrar e tampouco me gusta perder un combate

E que che gustaría conseguir a ti coas artes marciais?

Sería feliz se consigo chegar a ser adestradora

Noa 9 anos

Que é o que máis che gusta deste deporte?

A cantidade de cousas que aprendo. O que máis me gusta é aprender

Ata onde che gustaría chegar Noa?

A ser a número 1 de España

Luz 53 anos

E por último falamos coa veterana do grupo

Vaia sorpresa, non esperaba atopar unha alumna da miña xeración?

Nunca é tarde para chegar a este mundo. Eu comecei hai catro anos un pouco de broma e estou contentísima

Eu só teño un ano menos ca ti. Recoméndasmo?.

Absolutamente. Se o practicas vaste sentir moito mellor en todos os campos da túa vida