A avogada pontevedresa Paloma Castro leva dúas lexislaturas sendo deputada do PSdeG no parlamento galego. Nun contexto moi complicado para o partido socialista, a raíz da imputación do presidente Zapatero, nós quixemos conversar con ela para coñecermos a valoración das e dos socialistas da actualidade política.

“Que Rueda decidise facer portavoz a Alberto Pazos é un sinal evidente do ultra que é Alfonso Rueda”

Esta é a túa segunda lexislatura como deputada. Cando comezaches aínda estaba Feijoo como presidente da Xunta. Notas algunha diferenza significativa entre a actual lexislatura e a anterior?

Si, esta é unha lexislatura máis crispada.

Que motivos provocan, ao teu xuízo, esa crispación?

O PP está bastante máis escorado cara a dereita. De feito na pasada lexislatura podíamos ter pactado con eles nalgunhas cuestións, e agora iso é pouco menos que unha utopía.

Por exemplo?

En materias como a igualdade, a memoria ou os servizos sociais.

Hai poucas semanas Alfonso Rueda tendeulle a man de maneira máis que evidente a Vox avalando iso da “prioridad nacional” de maneira case explícita. Por que motivo, entendes ti, que o presidente da Xunta decide asumir a máis importante posición da extrema dereita?

Ben, eu entendo que trata de disputar a VOX os segmentos de voto máis escorados á dereita. Non se pode desbotar que nas municipais do 27 VOX acade concelleiros en Galicia. E por outra parte Rueda, aínda que ás veces simule unha posición moderada, sempre foi unha persoa moi de dereitas. Como esquecer a súa imaxe na manifestación de Galica Bilingüe¡.

Este asunto da “ prioridad nacional” e as súas posicións sobre a delincuencia, amosando unha realidade que en Galicia non existe, son manobras políticas para evitar a fuga a VOX dos seus votantes máis de dereitas.

E a súa posición sobre as baixas laborais iría tamén nesa liña?

Eu creo que con esa posición trata de contentar aos grandes empresarios.

Hai un problema real en Galicia de exceso de baixas laborais?, hai moitas persoas que finxen enfermidades que non teñen?

Desde logo que non. O que si que é verdade é que hai moitas persoas que teñen unhas condicións sociais de precariedade, non poden acceder a unha vivenda, teñen dificultades serias para chegar a fin de mes….e isto , o estrés permanente, día tras día todos e cada un dos días, evidentemente incide no deterioro do estado de saúde, especialmente da saúde mental.

O razoable é mellorar o sistema sanitario de atención pública para que os casos de ansiedade, depresión e estrés sexa tratados de maneira adecuada. O que non é razoable é o que fai o PP de premiar aos médicos que faciliten a fin da baixa, ou castigar aos que as prolonguen.

Como valoras o labor político do voceiro parlamentar do PP, Alberto Pazos?

Alberto Pazos e Paula Prado son a versión máis ultra que ten o PP. Que Rueda decidise facer portavoz do PP a Alberto Pazos é un sinal evidente de como é Rueda de ultra. Se comparamos a Pedro Puy con Alberto Pazos hai unha distancia quilométrica a nivel intelectual. En canto a talante, igual, Pedro Puy ten moito mellor talante. Alberto Pazos é un radical que aspira a ser Tellado.

O que si é un problema grave e real e o acceso á vivenda. Cal é a visión do PSdeG ao respecto?

Este é un problema que agora mesmo estoupou a burbulla .Pero xa leva moito tempo candente. En todos estes anos non existiu política pública de vivenda por parte da Xunta. Desde o ano 2010 non se construíu vivenda pública en Galicia

Agora, grazas a que o goberno de Pedro Sánchez puxo as políticas de construción de vivenda pública como prioridade, Galicia sumouse ao carro. Ata o momento a Xunta mirou para outro lado e agora xa é tarde.

Por outra banda tamén temos un problema de vivenda valeira e de falta de impulso aos alugueiros.

En canto ao estado da sanidade galega que tes que dicir?

Pois hai unha situación evidente de abandono e de falta dos recursos necesarios e suficientes. O PP sempre sostén que o problema é que non hai médicos. É falso. Os médicos saen da facultade. O que acontece é que os médicos en Galicia non teñen as oportunidades necesarias e acaban por marchar a outro lado.

A falta de estabilidade laboral dos médicos e médicas é terrible. Eu teño unha irmá médica de 36 anos que ten compañeiros e compañeiras de promoción que levan 10 anos encadeando contratos temporais. Esta política sanitaria que desenvolve o PP o que persegue en realidade é potenciar a sanidade privada.

Cales son as principais liñas políticas que está a desenvolver o PSdeG no parlamento galego na lexislatura actual?

Estamos desenvolvendo as liñas esenciais do noso proxecto socialdemócrata, galeguista e feminista:

-A transición ecolóxica,as enerxías renovables e a economía verde.

-A industrialización de Galicia. O emprego adecuado dos fondos next generation que foron completamente desaproveitados porque Rueda só se centrou no seu proxecto de Altri.

-A necesidade de mellorar substancialmente a sanidade galega.

-A urxencia de mudar as políticas sociais. Este é un eixo que debe ser fundamental na construción dunha sociedade decente, e que fraquea claramente na política da Xunta. Así o podemos ver por exemplo nas deficiencias existente na dependencia, ou no estado dos centros de atención aos menores, totalmente abandonados.

-Traballamos porque non se dea nin o máis mínimo paso atrás no que se refire á igualdade entre mulleres e homes. Somos especialmente belixerantes no que respecta á prevención e á denuncia de calquera tipo de violencias machistas.

-Defendemos a protección necesaria para o idioma galego e para todos os elementos propios da nosa cultura.

En relación a isto último quixera saber a túa opinión sobre o estado de saúde do noso idioma?

Os datos do IGE son moi preocupantes, e amosan que a política lingüística da Xunta é un absoluto fracaso. O idioma galego para o PPdeG só é un elemento folclórico.

Cal é a túa valoración sobre a imputación do presidente Zapatero?

Ben, a este respecto quixera dicir varias cousas: Eu confío na súa honestidade e agardo que todo quede en nada. Agora ben, se se demostrase que Zapatero cometeu algún tipo de ilegalidade para min sería unha decepción terrible. Tamén quero salientar que o obxectivo real deste episodio non é Zapatero senón Pedro Sánchez. Todas as balas que lle disparan a Zapatero, en realidade teñen como finalidade facer caer ao goberno de Pedro Sánchez.

E por último, o que cheira profundamente a podre é que poucos días antes de que se producise a imputación altos cargos do PP, como Ayuso ou o propio Feijoo, anunciasen que algo ía pasar proximamente con Zapatero. Como o sabían?

Ti es avogada de profesión Paloma. A instrución do caso de Begoña Gómez é unha investigación prospectiva?

Están rascando por todos os sitios a ver se encontran algo, si. Incluso contra o criterio da fiscalía. É asombroso que esa instrución non se tivera pechado hai moito tempo.

Como está a situación interna do PSdeG?

Estamos traballando moi ben, tranquilos , sen ningún tipo de liorta interna e con ilusión de podermos recuperar a confianza da maioría da sociedade galega.

Ben, dicir que o PSdeG vive un momento histórico sen liortas internas é unha noticia dunha enorme dimensión que case eclipsa ao resto da entrevista

Ha, ha ha..Si, a verdade é que é moi boa nova.

O liderado de Besteiro está consolidado?

Si, claramente si.

Cal é a túa valoración da moción de censura de Lugo?

A catadura moral de quen cunha man abraza aos familiares dun compañeiro morto, e coa outra asina unha moción de censura é unha vergoña. A falta de escrúpulos de quen non lle importa aproveitarse da morte de persoas para impulsar unha moción de censura é indecente. Sei positivamente que hai deputados do PPdeG que non estaban de acordo con este movemento e que de feito están avergonzados.

Rematamos:Como encara o PSdeG as municipais do 27?

É un proceso electoral de enorme importancia. Nós afrontámolo con enorme ilusión e con expectativas moi positivas. Estou segura de que conservaremos os gobernos que temos e que acadaremos algún máis. Imos a por todas para conservar as deputacións da Coruña e Lugo e imos tamén a recuperar a de Pontevedra.

Recuperar a deputación de Pontevedra é realista?

Absolutamente si. Só necesitamos un deputado máis. Nós confiamos en subir máis dun deputado provincial.