En marzo deste ano comezou a súa andaina o colectivo “Voces nas mans”. Eles son unha asociación de Ponteareas formada tanto por persoas xordas como por persoas oíntes. O seu obxectivo consiste en facilitar a inclusión das persoas con discapacidades auditivas, e facer de Ponteareas unha vila inclusiva na que non poder escoitar non sexa ningún problema para desenvolver a vida con normalidade.

Desde a asociación puxeron en marcha unha iniciativa moi interesante consistente en ensinar lingua de signos a distintos negocios de Ponteareas. A proposta de Voces nas mans foi un éxito superlativo, pois de 41 negocios aoa que se dirixiron, 40 dixeron que si. Este tipo de novas alegran o día cando as coñeces, e son as que aínda permiten conservar aceso o facho da esperanza no futuro da humanidade. Nós falamos con Teresa, a secretaria de voces nas mans. Velaí vai o que deu de si a nosa conversa

Teresa Camino, secretaria da asociación .

“Queremos unir dous mundos que sempre estiveron separados”

Como, cando e por que nace Voces nas Mans?

A idea xurdiu a raíz dun voluntariado o ano pasado, cando fixen un curso de lingua de signos na UNED e coñecín a unha rapaza xorda. Coñecín a Ana, a presidenta da asociación e comezamos a facer quedadas entre comunidade xorda e oíntes. Despois de comezar vimos que facía falta crear unha asociación para xuntar estes dous mundos.

Ti es oínte?

Si.

Es de Ponteareas?

Non, son de Barcelona pero levo aquí moitos anos.

Cando creastes a asociación?

Comezamos practicamente en marzo, así que levamos pouco máis de dous meses de vida. Todo foi moi rápido, pero tamén moi emocionante.

Cal é o principal obxectivo da asociación?

Queremos unir dous mundos que historicamente estiveron separados: o das persoas xordas e o das persoas oíntes. A comunidade xorda ensínanos lingua de signos e nós tamén compartimos actividades e proxectos con eles. O importante é crear convivencia real para calquera cousa cotiá da vida.

Cantas persoas forman parte actualmente da asociación?

Agora mesmo temos arredor de 58 persoas, 26 xordas e unhas 32 persoas oíntes. Moitas delas son familiares de persoas con discapacidade auditiva, pero tamén hai xente interesada simplemente en aprender e colaborar.

Onde vos xuntades?

De momento non temos local, estamos intentando conseguilo. Reunímonos unha vez por semana na Oficina Municipal de Voluntariado de Ponteareas, situada na segunda planta da biblioteca municipal ou no Concello.

A persoas que formades parte da asociación sodes de Ponteareas ?

Non só de Ponteareas. Hai xente de Mondariz, As Neves e incluso de Vigo que participa connosco. A maior parte son da comarca do Condado, pero cada vez chega máis xente doutros lugares.

Hai moitas persoas xordas en Ponteareas?

Nós coñecemos arredor de 28 persoas, pero seguramente haxa máis. Precisamente queremos darlle visibilidade á asociación para que máis persoas se acheguen e participen.

A maioría das persoas xordas nacen con discapacidade auditiva?

Na maior parte dos casos si, aínda que tamén hai persoas que perderon audición debido a enfermidades. Por exemplo, un dos membros da asociación quedou xordo tras sufrir unha meninxite. Outra, debido a unha enfermidade que a vai deixando xorda pouco a pouco, ven aprender lingua de signos para o día de mañá.

Ademais da aprendizaxe da lingua de signos, buscades tamén fomentar a integración social?

Claro. Pensamos que aínda non existe unha integración real das persoas xordas na sociedade. Moitas veces dependen doutras persoas para cuestións básicas da vida diaria, e iso xera frustración.

Fálanos do proxecto que estades intentando crear en Ponteareas?

Unha das persoas da asociación foi arranxar unhas gafas e a dependenta non conseguía entendelo. Acabou tendo que chamar á súa nai, unha señora de 75 anos, para acompañalo. Esta persoa ten 54 e esta situación creoulle unha frustración tremenda. Iso fíxonos pensar que unha persoa adulta debería poder resolver situacións de maneira autónoma .Entón falamos con distintos comercios da localidade para pulsar a súa dispoñibilidade á aprendizaxe da lingua de signos.

Como foi a resposta do comercio local?

Moi positiva. Dos 41 negocios cos que falamos, 40 dixeron que si e practicamente cubriuse enseguida. A xente mostrou moito interese desde o primeiro momento.

Quen imparte as clases de lingua de signos?

As propias persoas xordas. Queremos que sexa a comunidade xorda quen ensine directamente. Organizamos grupos pequenos, de tres persoas, para facilitar a comunicación e a aprendizaxe.

Que se necesita para formar parte da asociación?

Acudir con ganas de coñecer e aprender.

Como se poden poñer en contacto con vós?

No correo electrónico vocesnasmans@hotmail.com, aquí lles daremos todo a información precisa para comezar a colaborar.

E necesario pagar unha conta para formar parte da asociación?

Non, non temos. Estamos intentando falar coa alcaldesa para que non deixe un local e buscar orzamento a través dos organismos oficiais para que non ter que cobrar cotas e facemos os cursos de balde para que a comunidade xorda poda integrarse na vida diaria sen ningún atranco por non poder comunicarse.

Como están as relacións coa alcaldesa e o goberno municipal de Ponteareas?

Desde que comezamos a alcaldesa cédenos o local do pleno cando se pode para xuntarnos e vese boa vontade pola súa parte. Aínda non nos reunimos para pedir local e orzamento, xa veremos despois da xuntanza que teremos proximamente.

Esta asociación nace coa idea de ter continuidade no tempo?

Claro, pretendemos que veña para quedarse a longo prazo para poder facer de Ponteareas unha vila inclusiva e que a comunidade xorda poida sentirse plenamente integrada no pobo a través da lingua de signos.

Tamén traballades no ámbito da prevención ou das terapias auditivas?

Non, ese non é o noso campo. Nós centramos o noso traballo na inclusión social e na comunicación. Para cuestións médicas ou relacionadas coa audición sempre recomendamos acudir a profesionais especializados.

O que si imos facer e poñernos en contacto cunha intérprete para que veña axudar as persoas xordas que o precisen.

Os audiófonos serven para axudar a estas persoas con problemas auditivos?

Si, para a xente que a perda de audición non é total axuda a escoitar

Mantedes relación con outras asociacións galegas?

Si. Temos contacto con asociacións de Vigo e Ferrol, entre outras. A comunidade xorda en Galicia coñécese bastante e hai boa relación entre colectivos. Temos un proxecto que queremos facer o Camiño de Santiago inglés coa comunidade xorda, isto nunca se fixo. Imos xuntarnos 50 persoas, 30 da comunidade xorda e 20 oíntes para saír desde Ferrol, imos facer un documental do camiño para presentalo en Cans o ano que ven.

Cando ides facer o Camiño?

O 16 de agosto arrincamos.