Estimados responsables, traballadores, colaboradores e lectores da Nova Peneira:

Como alcaldesa de Redondela, é para min unha verdadeira honra dirixirme a todos vós a través destas liñas cun motivo tan especial e digno de celebración: os douscentos números da Nova Peneira. En nome de toda a corporación municipal e no meu propio, quero trasladarvos os meus máis sinceros parabéns por acadar este fito, que non fai máis que consolidar a vosa traxectoria como un piar fundamental do xornalismo de proximidade no noso territorio.

Para min, tamén como veciña de Redondela, é importante contar con medios de comunicación que coñezan a nosa realidade, que estean preto da cidadanía e que dean espazo a todo aquilo que fai de Redondela o que é. Porque Redondela non se constrúe unicamente desde as institucións. Constrúese cada día nas parroquias, nas asociacións, nos clubs deportivos, nas entidades culturais e no traballo desinteresado de tantas persoas que dedican o seu tempo e a súa ilusión a mellorar a vida dos demais. E é aí onde A Nova Peneira ten un valor especial: en darlles voz, en facer visible ese esforzo e en contribuír a que nos coñezamos mellor como comunidade.

Sempre defendín que gobernar é estar preto da xente, escoitar, dar a cara e traballar para dar resposta ás súas necesidades. E creo que o xornalismo de proximidade comparte algo esencial con esa maneira de entender o servizo público: a responsabilidade de mirar cara á realidade, contar o que acontece e non esquecer nunca as persoas que están detrás de cada noticia.

Nun tempo no que os bulos, a manipulación e o ruído parecen querer impoñerse tantas veces á verdade, contar cunha prensa libre, rigorosa e comprometida coa sociedade é máis necesario ca nunca. Unha sociedade democrática necesita información, voces diversas e espazos nos que poder coñecer, reflexionar e formar a súa propia opinión. A Nova Peneira representa ese xornalismo honesto e apegado á terra que protexe á cidadanía do ruído e da polarización. Grazas por ser o reflexo da nosa identidade, por dar voz a quen non a ten e defender os valores de respecto, igualdade, e progreso.

Por iso, hoxe non quero felicitarvos só por cumprir 200 números. Quero agradecervos o traballo, a constancia e o compromiso de manter viva unha cabeceira que forma parte da realidade do noso territorio e que contribúe a poñer en valor o que somos. Grazas por atender as nosas parroquias, por dar protagonismo á nosa xente e por acompañar, desde o voso labor xornalístico, a vida cotiá de Redondela e da súa contorna.

Deséxovos que sigades cumprindo moitos números máis, coa mesma ilusión, independencia e compromiso. Porque unha comunidade tamén se recoñece nas historias que conta e nas voces ás que decide escoitar.

Que sexan moitos números máis informando con valentía e rigor a prol de Redondela e da súa xente. Longa vida á Nova Peneira!

Digna Rivas

Alcaldesa de Redondela