Aarón Franco, novo presidente da Asociación Cultural Almuinha, liderará unha etapa de renovación e impulso cultural
A Asociación Cultural Almuinha inicia unha nova etapa con enerxía renovada tras a recente renovación da súa directiva. Como resultado deste proceso, a asemblea xeral de finais do ano 2024 elixiu a Aarón Franco Outón como novo presidente, reforzando así o compromiso da entidade coa promoción da cultura galega, a defensa da lingua e a posta en valor do patrimonio do País.
Aarón Franco Outón, historiador, docente e activista cultural, conta cunha ampla traxectoria no ámbito da dinamización social e cultural. Natural de Marín, leva anos implicado en proxectos que fomentan a identidade galega, a memoria histórica e a participación cidadá, tanto desde Almuinha como na súa faceta de escritor e investigador. Recentemente, publicou o seu poemario Punto e Coma, consolidando así a súa vinculación co mundo da literatura.
Na súa primeira intervención como presidente, Franco Outón expresou a súa gratitude pola confianza depositada nel e destacou a importancia de continuar e fortalecer o traballo da asociación. “Almuinha é un referente na defensa da nosa cultura e da nosa lingua. Queremos que esta nova etapa sexa unha oportunidade para abrir novas vías de participación e seguir facendo de Marín un espazo de cultura viva e accesible”, declarou.
A nova equipa directiva inicia esta etapa con ilusión, reforzando o traballo previo e promovendo novos proxectos que amplíen o alcance da cultura e a súa conexión coa sociedade. Con esta visión integradora, Almuinha aposta pola cultura como espazo de encontro, reflexión e participación, favorecendo a conciencia crítica e a proxección da sociedade desde a súa propia identidade.
A asociación reafirma o seu papel como motor cultural, impulsando unha cultura aberta, participativa e comprometida. Con ilusión e dedicación, a nova directiva traballará para fortalecer a identidade e o tecido cultural, mantendo vivo o espírito de dinamización e defensa da nosa herdanza.
Desde a chegada da nova Xunta directiva consolidáronse os talleres de pandeireta, teatro e baile galego, así como se vén facendo unha aposta pola presentación de libros e celebración de coloquios. Desde Carlos Callón, ata Lara Dopazo pasando por moitas máis autoras que estan por vir, a Asociación cultural Almuinha ten pechado xa un forte calendario de activades que traerá a fortes activos culturais do pais. Desde Emma Pedreira ate Iria Collazo, ou ao fundador da páxina Orgullo galego, Borxa González xunto a outras emprendedoras, Almuinha aposta pola firme defensa da cultura galega e das posibilidades que ten este pais e as súas propias forzas.
Para iso inicia un camiño de impulso renovado con persoas vencelladas ao mundo da cultura.
A.C. ALMUINHA.
Marín, 14 de Marzo do 2025
